فرمان الہی
نماز کے اوقات
ایران کے سپریم لیڈر آیت اللّٰہ خامنہ ای نے امریکی صدر ڈونلڈ ٹرمپ کی جانب سے نئے سرے سے مذاکرات کی پیشکش کو مسترد کر دیا۔
خامنہ ای نے سوشل میڈیا ویب سائٹ ایکس پر نئے سرے سے جوہری مذاکرات کا آغاز کرنے کی امریکی پیشکش پر اپنے ردِ عمل کا اظہار کیا ہے۔
اُنہوں نے اپنی پوسٹ میں ڈونلڈ ٹرمپ کے ایران کی جوہری صلاحیتوں کو تباہ کرنے کے دعوؤں کی تردید کرتے ہوئے طنزیہ انداز میں لکھا، ’امریکی صدر بڑے فخر سے کہتے ہیں کہ انہوں نے ایران کی ایٹمی صنعت پر بمباری کرکے تباہ کر دیا، بہت اچھے، خواب دیکھتے رہیں!‘
ایران کے سپریم لیڈر نے مزید لکھا، ’اس بات کا امریکا سے کیا تعلق ہے کہ ایران کے پاس جوہری تنصیبات ہیں یا نہیں؟ امریکا کی یہ مداخلت نامناسب، غلط اور زبردستی ہے‘۔
واضح رہے کہ گزشتہ ہفتے امریکی صدر نے اسرائیلی پارلیمنٹ میں خطاب کرتے ہوئے کہا تھا کہ اسرائیل اور فلسطینی مذاحمتی تنظیم حماس کے درمیان غزہ میں جنگ بندی کے آغاز کے بعد اگر امریکا اور ایران کے درمیان بھی ’امن معاہدے‘ پر مذاکرات کا نئے سرے سے آغاز ہوجائے تو بہت اچھا ہوگا۔
