فرمان الہی
نماز کے اوقات
بھارت میں ایک شادی کے موقع پر جہیز کے 31 لاکھ روپے لینے سے انکار کرنے والے دولہے کی بیوی کا بیان سامنے آگیا۔
گزشتہ روز بھارتی ریاست اتر پردیش کے ضلع مظفر نگر میں شادی کے موقع پر دولہا نے جہیز لینے سے انکار کرتے ہوئے 31 لاکھ روپے کی رقم دلہن کے والدین کو واپس کر دی تھی۔
دولہا اودھیش رانا کی دلہن ادیتی سنگھ کا کہنا ہے کہ میرے والد کا بہت عرصے پہلے انتقال ہوگیا تھا، جس کے بعد میری پرورش نانا نے کی تھی، جب رشتہ طے ہوا تو لڑکے والوں نے جہیز لینے سے انکار کردیا اور صرف ایک روپیہ لینے کا تقاضہ کیا اور انہوں نے اصل میں ایسا ہی کیا ہے۔
دلہن کا کہنا ہے کہ اس بات کا علم مجھے اپنے گھر والوں سے ہوا، جس کا سن کر مجھے بڑی خوشی ہوئی، کیونکہ ایسا بہت کم ہوتا ہے جبکہ لوگ اپنے منہ سے جہیز مانگتے ہیں۔
خاتون کا کہنا ہے کہ وہ اپنی سسرال میں بہت خوش ہیں، شوہر اور اس کے گھر والے میرا بہت خیال رکھ رہے ہیں۔
یاد رہے کہ اودھیش نے 22 نومبر کو شہر کے ایک بینکوئٹ ہال میں ادیتی سنگھ سے شادی کی، جس کی رسم کے دوران دلہن کا خاندان رقم پیش کرنا چاہتا تھا لیکن دولہا نے اسے لینے سے صاف انکار کر دیا۔
دولہا اودھیش رانا نے میڈیا سے بات کرتے ہوئے کہا کہ ہم جہیز کے سخت خلاف ہیں، یہ بالکل غلط ہے، اسے مکمل طور پر ختم ہونا چاہیے، کوئی باپ صرف بیٹی کی شادی کے لیے قرض تلے نہ دبے، ہمارا رشتہ ایک روپے سے شروع ہوا تھا اور وہیں ختم ہوتا ہے۔
