فرمان الہی
نماز کے اوقات
بھارتی شہر بنگلورو میں طلاق کا نوٹس بھجوانے کے ایک ہفتے بعد شوہر نے بیوی کو گولی مار کر قتل کردیا۔ ملزم نے واردات کے بعد خود پولیس اسٹیشن جا کر گرفتاری بھی دے دی۔
بھارتی میڈیا کے مطابق 39 سالہ مقتولہ بھونیشوری بینک آف انڈیا میں کام کرتی تھی جبکہ 40 سالہ ملزم بالموروگن سافٹ ویئر انجینئر اور گزشتہ چار برس سے بے روزگار تھا۔
جوڑے کی شادی 2011ء میں ہوئی تھی اور ان کے دو بچے بھی ہیں۔ ازدواجی تنازعات کے باعث دونوں ایک سال سے زیادہ عرصے سے الگ رہ رہے تھے۔
پولیس کا کہنا ہے کہ بالموروگن کو بیوی کے کردار پر شبہ تھا جس کی وجہ سے وہ اکثر اس کے ساتھ جھگڑتا رہتا تھا۔
بھارتی میڈیا کے مطابق تقریباً ایک ہفتہ قبل ہی بھونیشوری نے بالموروگن کو طلاق کا قانونی نوٹس بھجوایا تھا جس کا معاملہ عدالت میں زیر سماعت تھا۔
رواں ہفتے منگل کے روز بالموروگن نے مبینہ طور پر اپنی بیوی کی نقل و حرکت پر نظر رکھی اور شام دفتر سے گھر واپس لوٹنے پر اسے گولی مار کر قتل کردیا، بعد ازاں ملزم بالموروگن نے خود پولیس اسٹیشن جا کر گرفتاری دے دی۔
