فرمان الہی
نماز کے اوقات
متحدہ قومی موومنٹ (ایم کیو ایم) پاکستان کے رہنما مصطفیٰ کمال نے کہا ہے کہ الطاف حسین نے ڈاکٹر عمران فاروق کو قتل کرایا۔
کراچی میں پریس کانفرنس کرتے ہوئے مصطفیٰ کمال نے کہا کہ میں نے دو سال سے بانی ایم کیو ایم پر بات کرنا چھوڑ دی تھی،بانی ایم کیو ایم ڈرامے باز آدمی ہے۔
وفاقی وزیر مصطفیٰ کمال نے کہا کہ بانی ایم کیو ایم نے نشے میں دھت ہو کر عمران فاروق کو قتل کرنے کا حکم دیا، بانی ایم کیو ایم کی سالگرہ پر عمران فاروق کو مار کر تحفہ دیا گیا۔
انہوں نے کہا کہ عمران فاروق کے مرنے کے بعد اہلخانہ سے کوئی رابطہ نہیں تھا، بانی ایم کیو ایم سے کہتا ہوں وہ کیس کھلوائیں کہ اصل قاتلوں کا پتا لگایا جائے، وہ ہمت کریں میں اپنے پیسے سے اس کا ساتھ دینے کو تیار ہوں۔
مصطفیٰ کمال نے کہا کہ ہم نے بہت سی باتوں پر پردہ ڈالا، جب عمران فاروق کو قتل کیا گیا تھا میں پارٹی کی جانب سے گیا تھا، میں وہاں موجود تھا بانی ایم کیو ایم کو نمازِ جنازہ میں صرف تصویر بنوانی تھی۔
انہوں نے کہا کہ بانی ایم کیو ایم نے مسجد میں کیمرے کی اجازت نا ہوتے ہوئے بھی لڑکے سے تصویر بنوائی، میری مہاجر قوم بڑی بدقسمت ہے، کیا کرمنل قائد ملا ہے ہمیں، 40 سال میں کتنے لوگوں کو یہ کھا گیا، اب بھی کھا رہا ہے۔
وفاقی وزیر مصطفیٰ کمال نے کہا کہ بانی ایم کیو ایم مہاجر قوم کا سب سے بڑا غدار ہے، اسکاٹ لینڈ یارڈ کو پتا تھا عمران فاروق کو کس نے مارا ہے، اس لیے انہوں نے قتل کے 15 دن تک بچوں کو چھپا کر رکھا تھا، ڈاکٹر عمران فاروق کے بچے ابھی جوان ہوگئے ہیں۔
مصطفیٰ کمال نے کہا کہ عمران فاروق کے بچوں سے کہتا ہوں لندن میں اس شخص سے بچو، اپنے باپ کے قتل کی تحقیقات کے لیے عدالت جاؤ اور مقدمہ دائر کرو۔
انہوں نے کہا کہ یہ آدمی خاموشی کو کمزوری سمجھتا ہے، ایم کیو ایم کے اور لوگوں کو بھی پتا ہے لیکن وہ خاموش رہتے ہیں، اس آدمی نے ہمیں 200 سال پیچھے کردیا ہے، تعلیم تربیت سب تباہ کردیا اس نے، میں عمران فاروق کے قاتلوں کو گرفتار کرانے کے لیے ہر تعاون کے لیے تیار ہوں۔
وفاقی وزیر نے کہا کہ اس شخص نے میرا شہر تباہ کردیا ہے، ہم انشاء اللّٰہ اس شہر کو دوبارہ اسی جگہ لے کر جائیں گے۔
مصطفیٰ کمال نے کہا کہ حالیہ دنوں میں ڈاکٹر عمران فاروق کی اہلیہ کا انتقال ہوا، نام نہاد بانی ایم کیو ایم نے ان کی لاش کو لے کر واویلا مچایا، بانی ایم کیو ایم نے میت پاکستان بھیجنے کے لیے دنیا بھر سے چندا اکٹھا کیا۔
انہوں نے کہا کہ یہ آدمی خواتین سے منی لانڈرنگ کرا رہا ہے، امریکی ایجنسی نے اسے پکڑا ہے، کیا یہ آدمی امریکا میں جارہا ہے اس کو بچانے کے لیے؟ کیا اس نے وکیل کیا؟
مصطفیٰ کمال نے کہا کہ میں اس کے لیے پہلے دعائیں کرتا تھا مگر اب اس نے توبہ کا دروازہ بند کردیا، بانی ایم کیو ایم کو اب چپ رہ کر خاموشی سے مر جانا چاہیے، یہ آدمی ہے جس نے اس قوم اور شہر کو بیچا ہے۔
ایم کیو ایم پاکستان کے رہنما نے کہا کہ کیا میں 8، 8 گھنٹے کی رحمان ملک سے ملاقاتیں کرتا تھا؟، اس وقت اس کو قوم کا خیال نہیں آیا، یہ آدمی اس وقت پیپلز پارٹی سے اس آئینی ترامیم کو منواتا یہ کیسے نہیں مانتے۔
