فرمان الہی
نماز کے اوقات
پاکستان تحریک انصاف (پی ٹی آئی) سینیٹر بیرسٹر علی ظفر نے کہا ہے کہ ماحول اس وقت مذاکرات کا نہیں لگتا، ہماری پارٹی کو کسی قسم کی سیاسی سرگرمی کی اجازت نہیں۔
جیو نیوز کے پروگرام کیپٹل ٹاک میں گفتگو کے دوران بیرسٹر علی ظفر نے کہا کہ آئین کے آرٹیکل 17 کے مطابق ہر سیاسی جماعت کو سیاست کرنے کا حق ہے۔
انہوں نے کہا کہ پی ٹی آئی کو کسی قسم کی سیاسی سرگرمی کی اجازت نہیں دی جارہی، آرٹیکل 17 ٹو واضح کہتا ہے کہ ملک کی سالمیت کے خلاف کوئی سیاسی جماعت نہیں جاسکتی۔
پی ٹی آئی سینیٹر نے مزید کہا کہ اس آرٹیکل پر پارلیمنٹ میں بہت بحث ہوئی، پھر الیکشن ایکٹ بنایا گیا، الیکشن ایکٹ میں ایسی جماعت جو ملک کی سالمیت کے خلاف ہو اس کے خلاف تفصیلی ثبوت ہونا چاہیے۔
اُن کا کہنا تھا کہ صرف الزام لگانا کافی نہیں باقاعدہ ثبوت سپریم کورٹ یا آئینی عدالت میں پیش کرنا ہوتے ہیں، ماحول اس وقت مذاکرات کا نہیں لگتا۔
بیرسٹر علی ظفر نے یہ بھی کہا کہ ہماری قیادت پر کیسز بنائے جا رہے ہیں، ورکرز پر تشدد کیا جا رہا ہے، مذاکرات کا ماحول بنانے کا اختیار حکومت کے پاس ہے۔
انہوں نے کہا کہ حکومت ماحول بنا نہیں رہی تو اس لیے مذاکرات چل نہیں رہے، ایک موقف یہ بھی ہے کہ طاقت کے ذریعے ہی طاقتور کے ساتھ مذاکرات کا ماحول بناسکتے ہیں۔ ہمارے پاس عوام کی ایک بہت بڑی طاقت ہے، جس کو استعمال کرکے مذاکرات تک پہنچ سکتے ہیں۔
