فرمان الہی
نماز کے اوقات
کرین سے لٹک کر پھنسے پرندے کی جان بچانے والا شخص سوشل میڈیا کا ہیرو بن گیا۔
سوشل میڈیا پر ایک ویڈیو تیزی سے وائرل ہو رہی ہے جس میں ایک شخص اپنی جان خطرے میں ڈال کر تاروں میں پھنسے ایک پرندے کو آزاد کراتا دکھائی دیتا ہے۔
ویڈیو میں دیکھا جا سکتا ہے کہ وہ شخص خاصی بلندی پر کرین سے لٹک کر نہایت احتیاط کے ساتھ پرندے کو بچانے کی کوشش کر رہا ہے، جس پر صارفین کی جانب سے خوب داد دی جا رہی ہے۔
بھارتی میڈیا کی رپورٹس کے مطابق یہ واقعہ پنجاب میں پیش آیا، ویڈیو میں نظر آتا ہے کہ شخص زمین سے خاصی اونچائی پر کرین کے سہارے لٹکا ہوا ہے اور اس کے سامنے ایک اسٹریٹ لائٹ کے قریب تاروں میں ایک پرندہ بری طرح پھنسا ہوا ہے جو مسلسل چھٹکارا پانے کی کوشش کر رہا ہے، شدید خطرے کے باوجود وہ شخص پرسکون رہتا ہے اور پوری توجہ کے ساتھ پرندے کو آزاد کرانے میں مصروف نظر آتا ہے۔
وہ ایک نوکیلے آلے کی مدد سے آہستگی سے تار کاٹتا ہے، اس بات کا خاص خیال رکھتے ہوئے کہ نہ تو پرندے کو نقصان پہنچے اور نہ ہی اس کا اپنا توازن بگڑے، چند لمحوں بعد پرندہ آزاد ہو جاتا ہے اور اڑ جاتا ہے، جبکہ کرین پر موجود افراد اسے بحفاظت واپس کھینچ لیتے ہیں۔
ویڈیو وائرل ہوتے ہی صارفین کے جذباتی ردِعمل سامنے آئے اور بیشتر افراد نے اس شخص کی بہادری اور ہمدردی کو خوب سراہا۔
