فرمان الہی
نماز کے اوقات
پاکستان کرکٹ ٹیم کے سابق کپتان شاہد آفریدی نے ٹیسٹ کرکٹر احمد شہزاد اور سابق کرکٹر عمر اکمل کی حمایت کر دی۔
انہوں نے پاکستان سُپر لیگ (پی ایس ایل) میں دونوں کھلاڑیوں کی عدم شمولیت پر سوال اُٹھاتے ہوئے کہا ہے کہ دونوں کھلاڑی فرنچائز کرکٹ میں موقع ملنے کے مستحق ہیں۔
حال ہی میں بوم بوم آفریدی نے ایک ٹی وی پروگرام میں گفتگو کرتے ہوئے کہا کہ ایسے کھلاڑیوں کو مکمل طور پر نظر انداز کرنا مسئلہ بن جاتا ہے، خصوصاً جب وہ مسلسل ڈومیسٹک کرکٹ کھیل رہے ہوں اور اپنی فٹنس برقرار رکھے ہوئے ہوں۔
ان کا کہنا ہے کہ نئی ٹیموں کی شمولیت کے بعد توقع تھی کہ کچھ تجربے کار مقامی کرکٹرز کو موقع دیا جائے گا۔
شاہد آفریدی نے زور دیا کہ احمد شہزاد اور عمر اکمل دونوں باقاعدگی سے پریکٹس اور ٹریننگ سیشنز میں حصہ لے رہے ہیں اور ماضی میں شاندار کارکردگی دکھا چکے ہیں، یہ معیاری کھلاڑی ہیں، انہیں اس حد تک نظر انداز نہیں کیا جانا چاہیے تھا، کم از کم ایک فرنچائز کو انہیں موقع دینا چاہیے تھا۔
سابق آل راؤنڈر نے کہا کہ اگر میں کسی فرنچائز کا مالک ہوتا تو میں دونوں کھلاڑیوں کو ضرور اپنی ٹیم میں شامل کرتا۔
انہوں نے وضاحت دیتے ہوئے کہا کہ سینئر اور مزاج کے اعتبار سے مختلف کھلاڑیوں کو سنبھالنے کے لیے ٹیم مینجمنٹ ناگزیر ہے، ہر کھلاڑی کو ایک ہی طریقے سے نہیں سنبھالا جا سکتا، اصل کوچنگ یہی ہے کہ آپ کھلاڑی کی خوبیوں اور کمزوریوں کو سمجھ کر اس سے بہترین کارکردگی حاصل کریں۔
انہوں نے بطور کپتان اپنے تجربے کا حوالہ دیتے ہوئے کہا کہ باصلاحیت مگر حساس مزاج کھلاڑیوں کو مختلف انداز میں ہینڈل کرنا پڑتا ہے اور یہی اعلیٰ سطح کی قیادت کا تقاضہ ہے۔
ادھر دونوں کرکٹرز کے حامیوں کی جانب سے بھی مایوسی کا اظہار کیا جا رہا ہے۔
عمر اکمل نے حال ہی میں اپنے بھائی عمر اکمل کا نام پی ایس ایل پلیئرز آکشن میں شامل نہ ہونے پر برہمی کا اظہار کیا تھا۔
صورتِ حال اس وقت جذباتی رخ اختیار کر گئی جب احمد شہزاد ایک پروگرام میں گفتگو کے دوران آبدیدہ ہو گئے۔
انہوں نے کہا تھا کہ سابق ساتھیوں کو میدان میں دیکھنا اور خود منتخب نہ ہونا میرے کے لیے انتہائی تکلیف دہ تھا۔
واضح رہے کہ پی ایس ایل کے 11ویں ایڈیشن میں پہلی بار 8 ٹیمیں شریک ہوں گی، جن میں نئی فرنچائزز حیدرآباد ہیوسٹن کنگز اور سیالکوٹ اسٹالینز بھی شامل ہیں، ٹورنامنٹ 26 مارچ سے 3 مئی 2026ء تک جاری رہے گا۔
