فرمان الہی
نماز کے اوقات
امریکی سینیٹ میں ڈیموکریٹک پارٹی کے سینیٹرز نے ایران کے شہر مناب میں گرلز ایلیمنٹری اسکول پر ہونے والے حملے کی مکمل اور غیر جانبدار تحقیقات کا مطالبہ کیا ہے۔
عرب میڈیا کے مطابق امریکا کی جانب سے نشانہ بنائے گئے گرلز اسکول پر حملے کے نتیجے میں کم از کم 170 شہادتیں ہوئی تھیں جن میں بڑی تعداد بچیوں کی تھی۔
رپورٹس کے مطابق امریکی سینیٹرز نے مشترکہ بیان میں کہا ہے کہ اسکول کے بچوں پر حملہ ’انتہائی افسوسناک اور کسی بھی صورت ناقابلِ قبول‘ ہے۔
اُنہوں نے مطالبہ کیا ہے کہ امریکی محکمۂ دفاع واضح کرے کہ یہ سانحہ کیسے پیش آیا اور کیا پالیسی فیصلوں نے اس میں کوئی کردار ادا کیا؟ اس بیان پر دستخط کرنے والوں میں برائن شاٹز، جین شاہین، جیک ریڈ اور الزبتھ وارن سمیت اہم ڈیموکریٹ رہنما شامل ہیں۔
عرب میڈیا ’الجزیرہ‘ کے مطابق نئی ویڈیوز اور تحقیقات سے اشارہ ملا ہے کہ اسکول پر حملہ ممکنہ طور پر ’ٹوماہاک میزائل‘ سے کیا گیا تھا جو امریکی ہتھیار ہے اور اسرائیل یا ایران کے پاس موجود نہیں۔
امریکی حکومت کا متضاد مؤقف
امریکی صدر ڈونلڈ ٹرمپ نے دعویٰ کیا ہے کہ اسکول پر حملہ ایران نے خود کیا تھا تاہم امریکی وزیرِ دفاع پیٹ ہیگسیتھ نے اس مؤقف کی تصدیق نہیں کی اور کہا ہے کہ پینٹاگون واقعے کی تحقیقات کر رہا ہے۔
ہیگسیتھ اس سے قبل ایران کے خلاف کارروائیوں کو ’انتہائی مہلک‘ قرار دیتے ہوئے قواعدِ جنگ میں نرمی کا اعلان بھی کر چکے ہیں جس پر سینیٹرز نے تشویش کا اظہار کیا تھا۔
