فرمان الہی
نماز کے اوقات
وزیراعلیٰ بلوچستان میر سرفراز بگٹی نے کہا ہے کہ سیکیورٹی اداروں نے بلوچستان میں ایک کامیاب آپریشن کے دوران خاتون خودکش بمبار کو گرفتار کر لیا ہے۔
نیوز کانفرنس میں انہوں نے کہا کہ سیکیورٹی فورسز کی کارروائی نے بڑی تباہی سے بچا لیا، سیکیورٹی اداروں کا شکر گزار ہوں جس نے خودکش بمبار خاتون کو زندہ گرفتار کیا۔
وزیراعلیٰ بلوچستان نے کہا کہ دہشت گرد بلوچ خواتین کا استحصال کر رہے ہیں اور کالعدم تنظیم بی ایل اے نے خواتین کے احترام کو ختم کیا ہے، جبکہ نوجوانوں کو انتہاپسندی کی طرف لے جانے کی کوشش کی جا رہی ہے۔
انہوں نے کہا کہ بلوچستان کے عوام حکومت کے ساتھ تعاون کرتے ہوئے حساس معلومات فراہم کر رہے ہیں اور سیکیورٹی فورسز نے صوبے کو محفوظ بنایا ہے۔
سرفراز بگٹی کا کہنا ہے کہ بلوچ قوم غیرت مند ہے اور اسے لاحاصل جنگ کی طرف دھکیلا جا رہا ہے، جس پر غور کرنے کی ضرورت ہے، جبکہ خواتین کے معاملات کو لیڈیز پولیس کے ذریعے حل کیا جائے گا۔
گرفتار خاتون لائبہ نے نیوز کانفرنس میں اپنا بیان دیتے ہوئے کہا کہ میرا ضلع خضدار سے تعلق ہے، گھر میں اور گاؤں میں لوگ فرزانہ کے نام سے جانتے ہیں، مجھے طالبان کمانڈر ابراہیم نے خودکش بمباری کے لیے ذہن سازی کے بعد تیار کیا تھا۔
انہوں نے کہا کہ کمانڈر ابراہیم نے میرا رابطہ دل جان سے کروایا، جس نے مجھے بی وائی سی (بلوچ یکجہتی کمیٹی) کی راہنما ڈاکٹر صبیحہ سے ملوانا تھا، مجھے خودکش مشن کے لیے تیار کیا گیا تھا لیکن گرفتار ہوگئی، مجھے ٹارگٹ دیا گیا تھا کہ مزید لڑکیوں کو خود کش حملوں کے لیے تیار کروں، لیکن میں تمام خواتین سے کہوں گی کہ کسی غلط سرگرمی کا حصہ نہ بنیں۔
دوسری جانب وزیر مملکت برائے داخلہ طلال چوہدری نے کہا ہے کہ دہشت گردوں کے اسپانسرڈ بھارت سے ہیں، انھیں تربیت دی جاتی ہے۔
انہوں نے کہا کہ بی ایل اے اور دیگر دہشت گرد تنظمیوں کا تعلق بھارت سے ہے، جن اکاؤنٹس سے یہ سب کچھ کیا جاتا ہے زیادہ تر کا تعلق بھارت اور افغانستان سے ہے، پاکستان کو غیر مستحکم کرنے کی کوشش کی جارہی ہے، نیشنل ایکشن پلان پر عمل درآمد جاری ہے۔
