فرمان الہی
نماز کے اوقات
بھارتی اداکار ٹائیگر شروف پر فائرنگ کے واقعے کے بعد ایک بار پھر لارنس بشنوئی گینگ کی جانب سے بالی ووڈ شخصیات اور دیگر معروف افراد کو نشانہ بنانے کے واقعات زیرِ بحث آ گئے۔
بھارتی فلم ساز روہت شیٹی کی رہائش گاہ کے باہر رواں سال فروری میں فائرنگ کی گئی تھی، جہاں 5 گولیاں چلائی گئیں، لارنس بشنوئی گینگ نے اس واقعے کی ذمے داری قبول کی تھی۔
اپریل 2024ء میں ممبئی کے علاقے باندرہ میں اداکار سلمان خان کے گھر گلیکسی اپارٹمنٹس کے باہر موٹر سائیکل سوار 2 افراد نے 5 گولیاں چلائی تھیں، ممبئی پولیس نے لارنس بشنوئی گینگ سے مبینہ طور پر تعلق رکھنے والے متعدد مشتبہ افراد کو گرفتار کیا تھا۔
اس مقدمے میں 5 ملزمان وکی گپتا، ساگر پال، ہربال سنگھ، سونو کمار بشنوئی اور محمد رفیق چوہدری کے خلاف عدالتی کارروائی جاری ہے، چھٹے ملزم انوج کمار تھاپن کی مئی 2024ء میں پولیس حراست کے دوران موت ہو گئی تھی۔
جنوری 2000ء میں فلم ساز راکیش روشن پر ممبئی کے علاقے سانتاکروز میں قاتلانہ حملہ کیا گیا تھا، یہ واقعہ ان کی کامیاب فلم ’کہو نا پیار ہے‘ کی ریلیز کے تقریباً 1 ہفتے بعد پیش آیا، حملہ آوروں نے ان پر متعدد گولیاں چلائیں، جن میں سے ایک ان کے بائیں بازو پر لگی جبکہ دوسری سینے کو چھوتی ہوئی گزر گئی تھی۔
ٹی سیریز کے بانی گلشن کمار کو اگست 1997ء میں ممبئی کے علاقے اندھیری میں جیتیشور مہادیو مندر کے باہر فائرنگ کر کے قتل کر دیا گیا تھا، حملہ آوروں نے ان پر 16 گولیاں چلائی تھیں۔
بھارتی کامیڈین کپل شرما کے کینیڈا کے صوبے برٹش کولمبیا میں واقع ریسٹورنٹ ’کپس کیفے‘ کو گزشتہ سال جولائی سے اکتوبر کے درمیان فائرنگ کے 3 مختلف واقعات میں نشانہ بنایا گیا۔
پنجابی موسیقی کے معروف گلوکار سدھو موسے والا کو مئی 2022ء میں بھارتی ریاست پنجاب میں فائرنگ کر کے قتل کر دیا گیا تھا، 28 سالہ گلوکار گاڑی میں اپنے گاؤں کے جانب سفر کر رہے تھے کہ 2 گاڑیوں نے ان کا راستہ روک لیا، حملہ آوروں نے پستول اور اے کے 47 رائفلوں سے فائرنگ کی، جس سے وہ شدید زخمی ہو گئے اور اسپتال پہنچنے پر دم توڑ گئے۔
واقعے کے چند گھنٹے بعد بھارتی گینگسٹر گولڈی برار نے فیس بک پر قتل کی ذمے داری قبول کی تھی، گولڈی برار جیل میں قید گینگسٹر لارنس بشنوئی کا قریبی ساتھی ہے۔
بھارتی صحافی رتیش لاکھی کے مطابق قتل کی مختلف وجوہات بیان کی گئی تھیں، ان میں بشنوئی اور گولڈی برار کے قریبی ساتھی وکی مڈوکھیڑا کا 2021ء میں قتل بھی شامل تھا۔
سدھو موسے والا کے اس قتل میں مبینہ طور پر ملوث ہونے کے دعوے بھی سامنے آئے، تاہم ان الزامات کو براہِ راست ثابت نہیں کیا جا سکا۔
ممبئی کے معروف سیاست دان بابا صدیقی کو اکتوبر 2024ء میں اپنے بیٹے کے دفتر سے نکلتے ہوئے گاڑی کے قریب فائرنگ کر کے نشانہ بنایا گیا تھا، انہیں اسپتال منتقل کیا گیا، جہاں وہ دم توڑ گئے، بابا صدیقی اور سلمان خان کے درمیان طویل عرصے سے قریبی ذاتی تعلقات تھے۔
مہاراشٹر کی مخلوط حکومت کا حصہ رہنے والے سیاست دان کے قتل میں مبینہ مرکزی حملہ آور شیوکمار گوتم کی شناخت ہوئی، جبکہ اس کے ساتھی گرمیت سنگھ اور دھرم راج کشیپ کو گرفتار کیا گیا، شیوکمار گوتم کو بعد میں نیپال فرار ہونے کی کوشش کے دوران اتر پردیش سے گرفتار کیا گیا، ممبئی پولیس نے بعد ازاں اس گروہ کے روابط لارنس بشنوئی گینگ سے جوڑے۔
بشنوئی گینگ بالی ووڈ شخصیات کو کیوں نشانہ بناتا ہے؟
مختلف واقعات میں ذاتی دشمنی، گینگ وار، مبینہ انتقامی کارروائیوں اور خوف و دباؤ پیدا کرنے جیسے محرکات کا ذکر سامنے آتا رہا ہے، تاہم ہر واقعے کی وجوہات الگ ہو سکتی ہیں اور تمام حملوں کو ایک ہی مقصد سے جوڑنا درست نہیں، کسی بھی واقعے میں ذمے داری کے دعوے اور الزامات کو حتمی حقیقت ماننے کے بجائے پولیس تحقیقات اور عدالتی کارروائی کے نتائج کو اہمیت دینا ضروری ہے۔
