لاہور(نمائندہ خصو صی)امیر جماعت اسلامی سینیٹر سراج الحق نے کہا ہے کہ وزیر اعظم نواز شریف خود اپنے ہی بیانات اور موقف کے گرداب میں پھنس گئے ہیں ۔نواز شریف نے اپنی تقریر میں زور دیکر کہا تھا کہ وہ کسی قسم کا استثناءنہیں لیں گے لیکن ان کے وکیل سپریم کورٹ میں دستوری استثناءکی بات کررہے ہیں اور انہیں استثنی ٰکے ذریعے بچانا چاہتے ہیں جس کا واضح مطلب اعتراف جرم ہے ۔میڈیا سے گفتگو کرتے ہوئے سینیٹر سراج الحق نے کہا کہ نوازشریف نے قومی اسمبلی اور قوم سے خطاب میں اپنے پورے خاندان اور اپنے بیٹوں و بیٹی کو ایک اکائی اور فریق ظاہر کیا جبکہ مقدمہ میں اپنا الگ اور اپنے بیٹوں و بیٹی کے الگ الگ وکیل کھڑے کرکے ثابت کررہے ہیں کہ وہ ایک فریق نہیں جس سے ان کا صادق اور امین نہ ہونا ثابت ہوتا ہے ۔انہوں نے کہا کہ نوازشریف نے وزیر اعظم اور قومی اسمبلی کے رکن کی حیثیت سے دو حلف لئے ہیں جن میں قومی اسمبلی کے رکن کی حیثیت سے پاکستان کا تحفظ کرنے اور دستور کا پابند رہنے کا عہد کیا ، وزیر اعظم کی حیثیت سے دیگر نکات کے ساتھ یہ بھی عہد کیا ہے کہ وہ وزیر اعظم کی حیثیت کو اپنے مفادات کیلئے استعمال نہیں کریں گے۔انہوں نے قومی اسمبلی کے ایوان میں کھڑے ہوکر اپنے اور اپنے خاندان کے دفاع کیلئے تقاریر کیں جو اپنی حیثیت کا ناجائز استعمال ہے اور حقیقت یہ ہے کہ اس دن کے قومی اسمبلی کے ایجنڈے میں وزیر اعظم کی تقریر شامل نہیں تھی ۔ انہوں نے کہا کہ نواز شریف اور ان کے خاندان کے آمدنی و اثاثہ جات کے کاغذات و گوشوارہ جات اور قومی اسمبلی کی تقاریر وغیرہ میں بہت سارے تضادات ہیں ،ملکی قوانین کے مطابق الزامات کا جواب دینااور بار ثبوت ان کے خاندان پر عائد ہوتا ہے جس کے تقاضے پورے کرنے میں نوازشریف اور ان کا خاندان ناکام ر ہا ہے ۔انہوں نے کہا کہ کے پی کے میں کرپشن کی نشاندہی کریں اور عدالت میں جائیں، کرایہ میں ادا کروں گا، چور حکومت میں ہو یا اپوزیشن میں سب کا احتساب ہونا چاہئے۔پانامہ لیکس کسی فرد واحد کا نہیں پاکستانی قوم اور ملک کے مستقبل کا مسئلہ ہے ہم اس کو غیر معمولی اہمیت دے رہے ہیں ۔ سراج الحق
فرمان الہی
نماز کے اوقات
