راولپنڈی (اپنے رپورٹر سے) الیکشن کمیشن پاکستان نے ضلع کونسل راولپنڈی کی 9یونین کونسلوں کیلئے الیکشن شیڈول اور انتخابی عملہ کی تعیناتی کا اعلان کر دیا۔ جس کے تحت کوٹلی ستیاں کی چھ یونین کونسلیں 7‘ 8‘ 9‘ 10‘ 11‘ 12شامل ہیں۔ کہوٹہ کی ایک یونین کونسل نمبر 17اور تحصیل راولپنڈی کی دو یونین کونسلیں کوٹھہ کلاں ون اور کوٹھہ کلاں ٹو شامل ہیں۔ ان کیلئے ڈسٹرکٹ ریٹرننگ آفیسر ڈپٹی کمشنر راولپنڈی طلعت محمود گوندل، ریٹرننگ افسران میں حاجی صدیق کوٹلی ستیاں اور شہنشاہ بابر کہوٹہ اور کامران خان راولپنڈی کیلئے ہیں۔ کوٹلی کی چھ یوسیز کیلئے اسسٹنٹ ریٹرننگ آفیسر خالد ریحان اور محمد اجمل، کہوٹہ کیلئے منصور صدیق اور خالد پرویز جبکہ راولپنڈی کیلئے محمد سعید اور طاہر رضوان اسسٹنٹ ریٹرننگ آفیسر ہونگے۔ کاغذات نامزدگی کی وصولی 27‘ 28فروری کو ہو گی۔ یکم اور دو مارچ کو سکروٹنی، تین اور چار مارچ کو اعتراضات، 7مارچ آخری تاریخ برائے اپیل سماعت، 8مارچ کاغذات نامزدگی کی واپسی اور نظرثانی شدہ لسٹ جبکہ 21مارچ کو پولنگ ہوگی۔ 22مارچ کو ریٹرننگ آفیسران رزلٹ دینگے۔ 29مارچ کو نوٹیفکیشن جبکہ یکم اپریل کو نئے منتخب ارکان حلف لیں گے۔
فرمان الہی
نماز کے اوقات
