سجاول (نامہ نگار) ایم این اے ایاز علی شاہ شیرازی نے ایم ڈی عابد وحید شیخ کے ہمراہ ربن کاٹ کر سجاول میں بیت المال کے دفتر کا افتتاح کیا۔اس موقع پر خطاب کرتے ہوئے ایم این اے ایاز شاہ نے کہا کہ 9 مارچ کو وزیر اعظم میاں نواز شریف سجاول اور ٹھٹھہ اضلاع کا دورہ کرینگےـ وزیر اعظم کے دورے کی خوشی میں سجاول میں بیت المال اور پاسپورٹ آفس کا قیام سجاول کی عوام کے لئے ایک تحفہ ہے۔ مزید اعلانات خود وزیر اعظم 9 مارچ کو کرینگے ـ ایم ڈی بیت المال عابد وحید نے کہا کہ عنقریب بیت المال کے زیر اہتمام ضلع سجاول میں بچوں کی بنیادی تعلیم کے لئے اسکولز اور خواتین کو کڑھائی وغیرہ کی تربیت کے لئے دستکاری سینٹرز بھی قائم کیے جائیں گے۔ انہوں نے کہا کہ ضلع سجاول میں وفاق کے تحت قائم کیے جانے والے تمام اداروں میں خالی اسامیوں پر مقامی بے روزگار نوجوانوں اور خواتین کو تعینات کیا جائے گاـ اس موقع پر ڈائریکٹر بیت المال سندھ ڈاکٹر عدنان مجید ، مسلم لیگ (ن ) کے صوبائی نائب صدر سید نصیر شاہ شیرازی ، لعل بخش جتوئی ، شریف خان لغاری اور دیگر بھی موجود تھےـ۔
فرمان الہی
نماز کے اوقات
