کراچی ( اسٹاف رپورٹر)امیر جماعت اسلامی پاکستان سینیٹر سراج الحق نے کہا ہے کہ ملک میں روشن خیال اور باکرداردیانتدار قیادت جماعت اسلامی کے پاس موجود ہے، اس ملک کو ترقی دلانے کیلئے جماعت اسلامی کاساتھ دینے کی ضرورت ہے۔آج نوازشریف زرداری اور کسی کو بدلنے کی بجائے نظام کو بدلنے کی ضرورت ہے۔ ہر کوئی چاہتا ہے الیکشن ہو اور ہم اقتدار کے گھوڑے پر سوار ہوں عوام چاہے روتے رہیں۔ملک میں بار بار تجربے کرنے سے کرپشن ،بھوک، مہنگائی، بدامنی بدحالی میں اضافہ ہوا ہے۔ ہم نے کے پی کے میں باقاعدہ اپنے نظریات کے مطابق تیرہ نکات پر تحریک انصاف سے اتحاد کیا۔ داخلی اور خارجی ہر معاملے پر ہمارا نقطہ نظر واضح اور صاف ہے۔ان خیالات کا اظہار انہوں نے ڈیفنس کلفٹن ریزیڈنٹ کی جانب سے دیئے گئے عشائیے سے خطاب کرتے ہوئے کیا۔عشائیے سے جماعت اسلامی کراچی کے امیر حافظ نعیم الرحمٰن،ضلع جنوبی کے امیر عبد الرشید اور دیگر نے بھی خطاب کیا۔اس موقع پر جسٹس(ر)وجیہ الدین احمد اور دیگر بھی موجود تھے۔سراج الحق نے خطاب کرتے ہوئے مزید کہا کہ ملکی سیاست میں لیڈر کہتا ہے کارکن سنتا ہے مگرکارکن کی کوئی نہیں سنتا،ہرایسی سیاست سے میں پناہ مانگتا ہوں جو خدا بننے کی سیاست ہے ،ہماری سیاست مخلوق خدا کی خدمت اور انبیاء کی سنت کی پیروی ہے ۔
فرمان الہی
نماز کے اوقات
