فرمان الہی
نماز کے اوقات
سکھر (بیورو رپورٹ) پرانا سکھر کے علاقے وسپور محلہ میں 6سالہ بچی کے ساتھ مبینہ زیادتی اور قتل کا معمہ پولیس نے حل کرلیا۔ قتل میں ملوث تینوں ملزمان کو گرفتار کرکے ان کیخلاف تھانہ سی سیکشن میں قتل سمیت مختلف دفعات کے تحت مقدمہ درج کرلیا گیا ہے۔ 6سالہ بچی کے ساتھ مبینہ زیادتی اور قتل میں ملوث اس کے اپنے ہی رشتہ دار نکلے اور رسی سے گلہ گھونٹ کر قتل کئے جانے میں ملوث ہیں۔ پولیس نے گرفتار ملزمان کا 3روزہ ریمانڈ حاصل کرلیا ہے۔ پولیس کے مطابق 3روز قبل پولیس کو اطلاع ملی کہ پرانا سکھر کے علاقے وسپور محلہ میں 6سالہ بچی کی لاش ایک بند گھر میں موجود ہے جس پر پولیس نے لاش کو تحویل میں لیا اور پوسٹ مارٹم کے بعد ورثاء کے حوالے کردیا۔
ایس ایس پی سکھر مسعود احمد بنگش نے اپنی نگرانی میں پولیس افسران پر مشتمل ایک ٹیم تشکیل دی جس نےچند گھنٹوں میں متعدد مشتبہ افراد میں سے 3ملزمان وہ بھی گرفتار ہوئے جو واقعہ میں ملوث تھے۔ بچی کا قتل ابتدائی طور پر پولیس کے لئے ایک معمہ بنا ہوا تھا، جسے پولیس افسران نے احسن انداز میں اپنے فرائض انجام دیتے ہوئے حل کیا۔ بچی کے والد سیوا رام نے بتایا کہ میری بیٹی صبح سے ہی لاپتہ تھی جسے ہم نے رشتہ داروں اور عزیز و اقارب کے یہاں تلاش کیا مگر اس کا کچھ سراغ نہیں ملا اور شام گئے محلے کے ہی ایک بند گھر سے بچی کی لاش کی اطلاع ملی، قتل میں ملوث ملزمان چاند سنگھ، چندر سنگھ اور ہیرا لال میرے رشتہ دار ہیں جن سے زمین کے تنازع پر جھگڑا چل رہا ہے، اس سے پہلے بھی ملزمان نے مجھ کو ہراساں کیا تھا اور اب ملزمان نے میری معصوم بچی کو قتل کیا ہے۔ واقعہ کا مقدمہ تھانہ سی سیکشن میں بچی کے والد سیوا کی مدعیت میں درج کرلیا گیا ہے۔
