ممبئی ، فلائی اوور کے نیچے خوبصورت گارڈن

بھارتی شہر ممبئی میں ایک فلائی اوور کے نیچے خالی جگہ پر باغ بنا یاگیا ہے۔ اس فلائی اوور کے اوپر گاڑیاں دوڑتی ہیں اور نیچے شہری اپنا فارغ وقت پھولوں اور پودوں کے ساتھ گزارتے ہیں۔

ممبئی کے علاقے مٹنگا میں ڈاکٹر بابا صاحب روڈ پر واقع فلائی اوور کے نیچے خالی جگہ پر باغ بنایا گیا۔ باغ کا نام نانا لعل ڈی مہتا گارڈن رکھا گیا ہے۔

یہ فیصلہ اس خالی جگہ کو غلط استعمال، خاص طور پر نشہ کرنے والے افراد کی پناہ گاہ بننے سے بچانے کے لیے کیا گیا ۔

شہریوں نے اپنی مدد آپ کے تحت یہاں سیکورٹی گارڈز بھی تعینات کیے تاکہ وہ اس جگہ کو ان لوگوں سے محفوظ رکھیں اور یہاں کچرا کنڈی نہ بننے دیں۔

سال 2011 میں یہاں لوگوں نے مقامی و شہری حکومتوں کو درخواست دی جس میں تجویز پیش کی گئی کہ اس جگہ کو گارڈن میں تبدیل کردیا جائے۔

کئی درخواستوں کے بعد 2015 میں میونسپل کارپوریشن نے اس جگہ کی تزئین و آرائش کا کام شروع کیا۔

انجینئر ز اور آرکیٹیکٹس نے دریا کے بہاؤ کا مشاہدہ کیا اور اس کا نقش گارڈن کے فرش پر ڈیزائن کیا۔

چھ سو میٹر لمبے راستے کو نیلے رنگ سے رنگا گیا ہے جبکہ اطراف میں دریائے نرمادا کے کنارے واقع پہاڑوں کی نقل بنائی گئی ہے۔