سانحہ ماڈل ٹاؤن، ورثا نے رپورٹ کے حصول کیلئے درخواست دے دی

لاہور ہائیکورٹ کی جانب سےسانحہ ماڈل ٹاؤن کی رپورٹ عام کرنے کے بعد ورثا نے رپورٹ کے حصول کے لیے درخواست ایڈیشنل ہوم سیکریٹری پنجاب کو جمع کرادی۔

ذرائع کے مطابق سانحہ ماڈل ٹاؤن میں جاں بحق ہونےوالوں کے ورثا کی بڑی تعداد پنجاب سول سیکریٹریٹ کے سامنے پہنچی اور وہاں دھرنا دے دیا۔

ورثا میں خواتین، بچوں اور مردوں کی بڑی تعداد موجود تھےجب کہ انہوں نے مطالبہ کیا کہ سانحہ ماڈل ٹاؤن پر ہائیکورٹ کے حکم کےبعد رپورٹ دی جائے۔

سول سیکریٹریٹ میں چیف سیکریٹری اور ہوم سیکریٹری سمیت کوئی موجود نہیں تھا جس کے باعث ورثا نے اپنی درخواست ایڈیشنل ہوم سیکریٹری کے اسٹاف کو دی۔

گزشتہ روز لاہور ہائیکورٹ نے سانحہ ماڈل ٹاؤن کی تحقیقات سے متعلق جسٹس باقر نجی کمیشن کی رپورٹ کو عام کرنے کا حکم دیا تھا۔

پاکستان عوامی تحریک کے رہنما خرم نواز گنڈا پور کا کہنا ہے کہ رپورٹ آنے پر وزیراعلیٰ اور رانا ثنااللہ کا کردار سامنے آئے گا، حکم امتناع جاری نہ ہونے تک کاپی دینے کے پابند ہے، اگر کاپی جاری نہ کی گئی توتوہین عدالت ہوگی۔

واضح رہے کہ جون 2014 میں لاہور کے علاقے ماڈل ٹاؤن میں پیش آنےو الے واقعے میں پاکستان عوامی تحریک کے 14 کارکن جاں بحق ہوئے تھے۔