فرمان الہی
نماز کے اوقات
اسلام آباد (نمائندہ جنگ)وفاقی وزیر نجکاری دانیال عزیز نے کہاہے کہ اسحاق ڈار کے خلاف احتساب کے نام پر سیاسی کیس چلایا جا رہا ہے ۔ترین کیخلاف رپورٹ ایس ای سی پی سے غائب کردی گئی، عدالت میں جمع کرائے گئے کاغذات اصل کاغذات سے مطابقت نہیں رکھتے لیکن پھر بھی ہم قانون اور آئین کے سامنے جھکے ہوئے ہیں۔
جمعرات کووزیر خزانہ اسحق ڈار کی احتساب عدالت میں پیشی کے موقع پر میڈیا سے گفتگو کرتے ہوئے دانیال عزیز نے کہاکہ حیرانی اس بات کی ہے کہ پہلے دن سے اسحاق ڈار کا نام دور دور تک پاناما پیپرز میں شامل ہی نہیں تھا لیکن سب لوگ دیکھ رہے ہیں کہ پہلی بار سپریم کورٹ نے درخواست کو ناکارہ قرار دے دیا لیکن بعد میں اسے کار آمد کردیا گیا اورکس طریقے سے سیاسی انداز میں جس جس کو ٹارگٹ کرنا تھا اسے لپیٹ میں لے لیا گیا۔
انہوں نے کہا کہ سراج الحق کی پٹیشن میں اسحاق ڈار کانام نہیں ہے ،ْیہ سیاسی کیس چلایا جا رہا ہے۔ عوام کو تاثر دیا جا رہا ہے کہ احتساب چل رہا ہے لیکن پاناما پیپرز میں شامل باقی 499 لوگوں میں سے کسی ایک کو بھی ہاتھ نہیں لگایا گیا۔دانیال عزیز نے کہاکہ جماعت اسلامی کی اگست 2016 کی پٹیشن میں پاناما پیپرز میں شامل تمام لوگوں کے احتساب کا مطالبہ تھا لیکن بعد میں بڑے طریقے سے سب لوگوں کو سائیڈ پر کردیا گیا اور صرف نواز شریف کا نام شامل کرلیا گیا لیکن پھر بھی ہم قانون اور آئین کے سامنے جھکے ہوئے ہیں۔ دانیال عزیز نے کہا ہے کہ احتساب صرف نواز شریف ا ور اس کے خاندان کا ہو رہا ہے ‘جہانگیر ترین کے خلاف رپورٹ ایس ای سی پی سے غائب کر دی گئی ہے۔ جمع کرائے گئے کاغذات اصل کاغذات سے مطابقت نہیں رکھتے ۔ جمع کرائے گئے 522 صفحات میں سے ہر صفحہ پر اعتراض لگا ہے۔
