اسلام آباد(نمائندہ جنگ) آل پاکستان مسلم لیگ کے چیئرمین سید پرویز مشرف نے کہا ہے کہ موجودہ حالات میں مارشل لاءیا فوری انتخابات کے امکانات کم ہیں تاہم قومی حکومت قائم ہوسکتی ہے۔ سیاستدانوں کی بجائے ٹیکنوکریٹس پر مشتمل قومی حکومت ملک کیلئے فائدہ مند ثابت ہوگی۔ کراچی میں بڑا خلا ہے ہم اتحاد بنا کر یہ خلاپرکریں گے۔ ان خیالات کا اظہار انہوں نے جمعرات کو دبئی کے ایک مقامی ہوٹل میں آل پاکستان مسلم لیگ کے نومنتخب عہدیداران اور مرکزی مجلس عاملہ کے اراکین سے خطاب کرتے ہوئے کیا۔ انہوں نے کہا کہ پاکستان میں نسلی بنیادوں پر سیاست ہورہی ہے جو ملک کے لئے نقصان دہ ہے۔ ہم نے قومی سطح کی سیاسی جماعت متعارف کرانی ہے۔اے پی ایم ایل کے انٹرا پارٹی انتخابات پر مطمئن ہوں۔ کارکنان اور عہدیداران چین آف کمانڈ کی پیروی کریں ، ملک بھر میں ریجنز اور اضلاع کی سطح پر بڑے جلسے منعقد کئے جائیں۔ پرویز مشرف نے کہا کہ موجودہ حالات میں سے تین قسم کی صورتحال جنم لے سکتی ہے۔ ایک یہ کہ موجودہ حکومت کو تحلیل کر کے نئے انتخابات کرائے جائیں، دوسرے قومی حکومت تشکیل دی جائے اورتیسری صورتحال مارشل لاءکے نفاذ کی ہے جو کہ ممکن نہیں ہے۔ان کا کہنا تھا کہ قومی حکومت اگر سیاسی جماعتوں کو ملا کر بنائی جاتی ہے تو اس کا کوئی فائدہ نہیں البتہ اگر یہ ٹیکنوکریٹس پر مشتمل ہوتی ہے تو ملک کے لئے فائدہ مند ثابت ہوگی۔
فرمان الہی
نماز کے اوقات
