لندن(ودود مشاق) عوامی مسلم لیگ (اے ایم ایل ) کے رہنما شیخ رشید کے برطانیہ میں مشیر اور اے ایم ایل کے عہدیدار منصور کیانی نے نواز شریف کے بیٹوں کی زیر ملکیت ایونفیلڈ اپارٹمنٹس کی تحقیقات کے لئے لندن آنے والی دو نیب آفیسرز کی میزبانی کی وہ آفیسرز تحقیقات کی غرض سے ایک ہفتے کے لئے لندن آئے تھے۔ نیب کے ایک ذریعے نے اے ایم ایل کے عہدیدار منصور کیانی کی سوشل میڈیا پر جاری تصاویر کی جانب توجہ دلائی اور اس پر تشویش کا اظہارکیا کہ نیب آفیسرز نے سرکاری اسائنمنٹ کے دوران سیاسی سرگرمیوں میں ملوث ہوکراپنے کنڈکٹ کے بارے میں شدید شکوک پیدا کردیئے ہیں، تصاویر میں دکھایا گیا ہے کہ تحقیقاتی آفیسرز سلطان نذیر اور عمران ڈوگر ویسٹ لندن کے پاکستانی ریسٹورنٹ میں منصور کیانی کے ساتھ ہیں ۔نیب ذرائع نے کہا کہ نواز شریف اور ان کے بچوں کے خلاف تحقیقات کے حساس نوعیت کے سرکاری بزنس کے دوران سیاستدانوں سے ملاقاتیں کرکے آفیشل پروٹوکول کی خلاف ورزی کی ہے، یہ دونوں آفیسرز ایونفیلڈ اپارٹمنٹس کی تحقیقات اور برطانوی حکومتی آفیسرزسے ملاقاتوں کیلئے لندن گئے تھے۔ منصور کیانی نے دی نیوز کو بتایا ہے کہ نیب آفیسرز میرے دیرینہ دوست ہیں جن کو میں ڈنر پر لے گیا تھا، عمران ڈوگر میرا دوست ہے اور میں نے ان کے ساتھ ملاقات کرکے کوئی غلط کام نہیں کیا، ایک ہفتے قبل اسی ریسٹورنٹ میں اے ایم ایل کے لیڈر شیخ رشید نے پریس کانفرنس کی تھی جس میں منصور کیانی ان کے ساتھ کھڑے تھے وہ طویل عرصے سے شیخ رشید کے لئے کام کررہے ہیں، ان کا کہنا ہے کہ میں نے نیب ٹیم کی دعوت کی لیکن آفیشل بزنس سے متعلق کوئی بات نہیں کی،یہ صرف دوستوں کی ری یونین تھی۔ پاکستان ہائی کمیشن کے ایک ذریعے نے کہا کہ دو نیب آفیسرز نے ان سے فیسیلی ٹیشن کے لئے ان سے کوئی رابطہ نہیں کیا تھا، اس لئے لندن میں ان کی سرگرمیوں کے بارے میں کوئی کمنٹس نہیں کرسکتے۔ باور کیا جاتا ہے کہ نیب ٹیم کے ارکان کو منصور کیانی لندن میں اپنی کار میں گھماتے رہے اور وہ تقریباً چار دن تک ان کے ساتھ رہے۔ پاناما کیس کی سماعت کے دوران یہ انکشاف ہوا کہ واجد ضیا نے لندن میں اپنے کزن اخترراجہ کی خدمات جے آئی ٹی تحقیقات میں بھاری معاوضے پر حاصل کی تھیں۔ نواز شریف نے اپنی تقریر میں اس پراعتراض کیا تھا۔
فرمان الہی
نماز کے اوقات
