اسلام آباد(صباح نیوز)اسلام آباد کی احتساب عدالت نے اسحاق ڈار کے خلاف آمدن سے زائد اثاثہ جات ریفرنس کی سماعت 2جنوری تک ملتوی کردی ۔ جمعرات کو کیس کی سماعت احتساب عدالت کے جج محمد بشیر نے کی ۔ نیب پراسیکوٹر نے عدالت کو بتایا کہ اسلام آباد ہائیکورٹ نے مزید کارروائی پر حکم امتناع دے دیاہے۔جج محمد بشیر نے استفسار کیا کیا آپ کو آرڈر کی کاپی ملی ہے؟ اس پر نیب پراسیکیوٹر عمران شفیق نے عدالت کو بتایا کہ آرڈر کی کاپی کے لیے درخواست کی ہے مگر ملا نہیں۔ چھٹیوں کے بعد کی کوئی تاریخ دے دیں تو آرڈر حوالے کردیں گے۔جج محمد بشیر نے استفسار کیا اسلام آباد ہائیکورٹ میں آئندہ تاریخ سماعت کیاہے؟ اس پر نیب پراسیکیوٹر کا کہنا تھا کہ اسلام آباد ہائیکورٹ نے 17جنوری تک کے لیے حکم امتناع دیا ہے۔جج محمد بشیر نے پوچھا اسحاق ڈار کی طرف سے کوئی آیاہے؟اس پر نیب پراسیکوٹر نے کہا اسحاق ڈار کی طرف سے کوئی نہیں آیا وہ تو چاہتے ہی یہی ہیں، اب اسحاق ڈار کی نیک نیتی بھی معلوم ہوجائے گی وہ اتنے عرصے میں واپس آتے ہیں یا نہیں۔عدالت نے کیس کی مزید سماعت 2 جنوری تک ملتوی کردی۔
فرمان الہی
نماز کے اوقات
