فرمان الہی
نماز کے اوقات
راولپنڈی کے علاقے مورگاہ ، آفیسرز کالونی میں اپنے ہی گھر والوں کو یرغمال بنانے والا شخص پولیس اور ایلیٹ فورس کے ایکشن کے بعد گرفتار کر لیا گیا ۔ملزم نے فائرنگ کرکے اپنے سسر اور پولیس اہلکار کو زخمی کیا۔
راولپنڈی کی آفیسرز کالونی مورگاہ میں نشے کے عادی عبدالرحیم نامی نے اپنے ہی گھر والوں کو اسلحے کے زور پر یرغمال بنا لیا ۔جنونی شخص نے فائرنگ کرکے اپنےسسر اور ایک پولیس اہلکار کو زخمی کر دیا۔اہل خانہ کا کہنا ہے عبدالرحیم نشے کا عادی ہے ۔ جوا ہارنے کے بعد اُس نے گھر والوں کو یرغمال بنایا۔
پولیس کا کہنا ہے کہ جب اس نے اہل خانہ کو یرغمال بنایا تو ایک بچہ گھرکی نچلی منزل تک بھاگ کرنکلنے میں کامیاب ہو گیا تھا۔
پولیس نے کوشش کی کہ عبدالرحیم اسلحہ پھینک دے لیکن وہ نہ مانا ، پولیس نے گھر میں آنسو گیس کے دو شیل پھینکے اور ملزم کو زخمی حالت میں گرفتار کرلیا۔
وزیرستان سے تعلق رکھنے والے ایک ہی خاندان کے بیس سے زائد افراد اس گھر میں رہائش پذیر ہیں ۔ اہل خانہ کا کہنا ہے ملزم نے انہیں کئی گھنٹے تک گھر کے ایک کمرے میں بند رکھا۔
سی پی او راولپنڈی اسرار عباسی کے مطابق اپنے ہی گھر والوں کو یرغمال بنانے والے جنونی شخص عبدالرحیم کو پولیس کے کامیاب آپریشن کے بعد قابو کرلیا گیا ۔
تفتیشی حکام کا کہنا ہے مغویوں کے بیانات قلم بند کیے جانے کے بعد تحقیقات کا آغاز کیا جائے گا ۔
