مانچسٹر(نمائندہ جنگ)انٹرنیشنل نعت ایسوسی ایشن کے بانی چیئرمین اور معروف ثنا خواں و استاد القریٰ قاری جاوید اختر چشتی زیارت روضہ رسولؐ و مسجد نبوی علیہ السلام کے لئے برطانیہ سےسعودی عرب روانہ ہوگئے۔ وہ مدینۃ المنورہ سے عمرہ کی سعادت حاصل کرنے کے لئے مکۃ المکرمہ بھی جائیں گے۔ روانگی سے قبل جنگ اور دیگر صحافیوں سے گفتگو کرتے ہوئے انہوں نے کہا کہ الحمدللہ انہوں نے گزشتہ تین دہائیوں سے زائد عرصے سے برطانیہ میں خدمات سرانجام دی ہیں اور سب سے زیادہ انہوں نے نوجوان نسل میں حب رسول کریم صلی اللہ علیہ وسلم کو اجاگر کرنے پر بلا تفریق مسلک خدمت کی ہے۔ برطانیہ یورپ میں نوجوان مسلمان اسلام اور آقائے تاجداد ختم نبوت صلی اللہ علیہ وسلم سے بے پناہ محبت کرتے ہیں انہوں نے کہا کہ مرکزی جامع مسجد وکٹوریہ پارک نے نارتھ ویسٹ میں مسلمان کمیونٹی کو متحد متحرک کرنے کے لئے گرانقدر خدمات سرانجام دی ہیں۔ ہمیں ذاتی خاندانی مسلکی اور مشربی اختلافات سے مکمل گریز کرنا چاہئے اور اخلاص اور اللہ کی رضا کے لئے تلخیوں کو ختم کرکے اتحاد امت مسلمہ کے لئے اور اسلام مخالف پروپیگنڈہ کے خاتمے کے لئے مل کر کام کرنا چاہئے۔
فرمان الہی
نماز کے اوقات
