• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ملک کی اقتصادی ترقی کو مدنظر رکھ کرمعاشی اصلاحات کرنا ہونگی،احسن اقبال

آج کا اخبار
اہم خبریں
20 مارچ ، 2018
اسلام آباد(اے پی پی) وفاقی وزیر منصوبہ بندی، ترقی و اصلاحات پروفیسر احسن اقبال نے کہا ہے کہ 2013ءکے مقابلے میں 2018ءکا گوادر پرامن اور خوشحال ہے، گوادر پاکستان کا مستقبل ہے، پاکستان 2025ءتک دنیا کی 25 بڑی معیشتوں میں شامل ہو جائے گا، ملک کو ترقی کی راہ پر گامزن کرنے کیلئے ہم سب کو مل کر کام کرنا ہوگا، گوادر کے نوجوان اس ملک کا مستقبل ہیں۔ ان خیالات کا اظہار انہوں نے گوادر یونیورسٹی کے دورہ کے موقع پر طلباءو طالبات سے گفتگو کرتے ہوئے کہی۔ وفاقی وزیر نے کہا کہ اکیسویں صدی نظریہ کی نہیں بلکہ تعلیم اور معیشت کی صدی ہے، نظریاتی مباحثوں سے بالاتر ہو کر اقتصادی ترقی کو مدنظر رکھ کر معاشی اصلاحات کرنا ہوں گی۔ انہوں نے کہا کہ ہمیں آگے بڑھنے کیلئے معیشت کی ترقی پر توجہ دینا ہوگی۔ انہوں نے کہا کہ چین نے اسی سوچ کو پروان چڑھا کر دنیا میں معاشی انقلاب لانے میں کامیابی حاصل کی۔ انہوں نے کہا کہ ہمیں پیداواری معیار میں بہتری اور جدت لانا ہوگی، ملک کی ایکسپورٹ بڑھانے کیلئے ٹھوس اقدامات کرنا ہوں گے۔ انہوں نے کہا کہ حکومت صحت، تعلیم، پبلک ہیلتھ اور غذائیت کے مسائل پر ترجیحی بنیادوں پر اقدامات کر رہی ہے۔ انہوں نے کہا کہ سی پیک منصوبہ سے خوفزدہ ہونے کی ضرورت نہیں، اس سے ہم اس خطہ کے لوگوں کی زندگیاں بدل دیں گے۔ انہوں نے کہا کہ حکومت پاکستان نے اپنی مدد آپ کے تحت کوئٹہ سے گوادر تک سڑک بنا کر 40 گھنٹے کا سفر 8 گھنٹے کا کر دیا جس سے لوگوں کی زندگیوں میں آسانیاں پیدا ہوئیں۔ انہوں نے کہا کہ گوادر کو بڑے شہروں کی صف میں لانے کیلئے حکومت نے بہترین اقدامات کئے ہیں۔ انہوں نے کہا کہ گوادر پورٹ، ماسٹر پلان، اکنامک زون، ووکیشنل ٹریننگ سینٹر اور گوادر یونیورسٹی سے گوادر کا تشخص تبدیل ہوگا۔ انہوں نے کہا کہ سی پیک میں ہونے والی سرمایہ کاری کا 80 فیصد توانائی کے شعبہ میں ہے، سی پیک کی بدولت پاکستان کی تاریخ میں یہ سب سے بڑی سرمایہ کاری ہے، توانائی منصوبوں کی بدولت عوام کو بجلی ملے گی جبکہ صنعتکار کا رکا پہیہ ایک بار پھر سے چل پڑے گا۔ انہوں نے کہا کہ سی پیک منصوبہ کے تحت صنعتی شعبہ میں تعاون سے پاکستان جنوبی ایشیا میں صنعتی پیداوار کا مرکز بن کر ابھرے گا۔ انہوں نے کہا کہ بلوچستان میں اعلیٰ تعلیم کے فروغ کیلئے صوبے کے تمام اضلاع میں سب کیمپسز قائم کئے جا رہے ہیں، اس سے بلوچستان کے طلباءو طالبات علم کی روشنی سے روشناس ہوں گے۔ انہوں نے کہا کہ 70 سال سے سوئی سے ہم گیس لے رہے ہیں لیکن گذشتہ حکو متوں نے اس کی ترقی پر کوئی توجہ نہیں دی، موجودہ حکومت نے برسراقتدار آتے ہی یہاں کی زمینوں کو زیرکاشت لانے کیلئے کچھی کینال کا منصوبہ شروع کیا جس سے ابتدائی طور پر 72 ہزار ایکڑ زمین زیرکاشت آئے گی اور بعد میں اس میں اضافہ سے ایک لاکھ 62 ہزار ایکڑ زمین زیرکاشت آئے گی جس سے بلوچستان اور سوئی کی زمینیں سرسبز وشاداب ہو جائیں گی۔ انہوں نے کہا کہ چینی زبان سکھانے کیلئے گوادر کے پچاس نوجوانوں کو سکالرشپ کے تحت چین بھجوایا جا رہا ہے۔
تازہ ترین