شب برأت کے پروگرامز کیلئے راولپنڈی پولیس کاسکیورٹی پلان تشکیل

میرا شہر

اسلام آباد

30 اپریل ، 2018

راولپنڈی (سٹاف رپورٹر) راولپنڈی پولیس نے شب برأت کے سلسلہ میں منعقد ہونے والے پروگرامز کیلئے سکیورٹی پلان تشکیل دے دیا، راولپنڈی پولیس کے پانچ سوافسران و ملازمین ڈیوٹی سرانجام دیں گے۔ سٹی پولیس آفیسرراولپنڈی افضال احمد کوثر کی خصوصی ہدایات پر راولپنڈی پولیس نے شب برأت کیلئے خصوصی سکیورٹی پلان تشکیل دیا ہے ۔ سکیورٹی پلان کے مطابق راولپنڈی پولیس کے تقریباً 500افسران و ملازمین ڈیوٹی سرانجام دیں گے ۔ شب برأت کے موقع پر مساجد ،امام بارگاہوں اور مختلف مقامات پر ہونے والے پروگرامز پر اضافی نفری تعینات کی گئی ہے ۔ مساجد ،عبادت گاہوں میں آمدورفت کیلئے ایک دروازہ کھولا جائے گا اور کسی شخص کو جامہ تلاشی اور میٹل ڈیٹیکٹر سے چیکنگ کے بغیر داخل ہونے کی اجازت نہ ہو گی۔مساجد کے قریب کسی قسم کی پارکنگ اور ریڑھی وغیرہ کھڑی کرنے کی اجازت نہ ہو گی۔ عبادت گاہوں کے نزدیک شاپنگ بیگ، لاوارث سامان اور مشکوک افراد کی خصوصی پڑتال کی جائے گی۔ لاؤڈ سپیکر اور ساؤنڈ آرڈیننس پر سختی سے عمل درآمد کرایا جائے گا۔ اور خلاف ورزی کی صورت میں قانونی کارروائی عمل میں لائی جائے گی۔ ضلع راولپنڈی کے داخلی و خارجی راستوں پر چیکنگ کے نظام کو مزید موثر بنایا جائے گا۔شب برأت کے موقع پر آتش بازی اور ہوائی فائرنگ کرنے والوں کیخلاف سخت کارروائی عمل میں لائی جائے گی۔ راولپنڈی پولیس شہریوں کے جان ومال کے تحفظ کے ساتھ ساتھ اپنے پیشہ وارانہ فرائض بھرپور ذمہ داری اورتن دہی سے انجا م دے گی۔

تازہ ترین