فرمان الہی
نماز کے اوقات
سکھر (بیورو رپورٹ) ضلع سکھر میں پیپلز پارٹی کی جانب سے قومی و صوبائی اسمبلی کی 6نشستوں پر کلین سوئپ کئے جانے کی خوشی میں جیالے مسرت کا اظہار کرتے ہوئے سڑکوں پر نکل آئے۔ ڈھولک کی تھاپ پر دیوانہ وار رقص، مٹھائیاں تقسیم کرکے فتح کا جشن منایا گیا۔ موٹر سائیکل پر سوار نوجوانوں نے پارٹی پرچم اٹھاکر شہر کی مختلف شاہراہوں پر گشت کیا اور شہر جئے بھٹو کے نعروں سے گونج اٹھا۔ پیپلز پارٹی کے رہنما سید خورشید احمد شاہ کی سوسائٹی میں واقع رہائشگاہ جبکہ نعمان اسلام شیخ کی رہائشگاہ سکھر ہاؤس پر رہنماؤں و کارکنوں کی ایک بڑی تعداد صبح سے لیکر رات گئے تک جمع رہی۔ پیپلز پارٹی کی کامیابی کی خوشی جیالوں کے چہروں سے واضح دکھائی دے رہی تھی اور وہ خوشی سے پھولے نہیں سمارہے تھے۔ پارٹی جیالوں کی ایک بڑی تعداد نے موٹر سائیکلوں، کارووں سمیت دیگر چھوٹی و بڑی گاڑیوں میں سوار پارٹی پرچم اٹھاکر لاؤڈ اسپیکر کے ذریعے پارٹی گیت سنتے ہوئے مختلف شاہراہوں پر گشت کیا اور جئے بھٹو، زندہ ہے بی بی زندہ ہے کے نعرے بلند کئے۔ کارکنوں کا جوش و خروش دیدنی تھا، پی پی جیالے رات دیر گئے شہر کی مختلف شاہراہوں پر گشت کرکے فتح کا جشن مناتے رہے۔ پارٹی رہنماؤں کی جانب سے کامیابی کی خوشی میں مٹھائیاں بھی تقسیم کی گئیں جبکہ مختلف مکاتب فکر سے تعلق رکھنے والی شخصیات کی جانب سے پی پی رہنماؤں کی کامیابی کی خوشی میں انہیں مبارکباد دیکر نیک خواہشات کا اظہار بھی کیا گیا۔
