لاہور کے کینال روڈ پر طلبہ اور چنگچی رکشا ڈرائیوروں کے دھرنے جاری ہیں ،طلبہ کے دھرنے کو 8 گھنٹے سے زائد کا وقت گزرگیا ۔
دھرنوں کے بعد کینال روڈ پر ٹریفک کی آمد و رفت معطل ہے جس کے بعد دونوں اطراف ٹریفک جام ہوگیا ، گاڑیوں کی لمبی قطاریں لگ گئیں،شہری پریشان ہوگئے۔
کینال روڈ پر دھرنے پر بیٹھے طلبہ یونیورسٹی آف سرگودھا کے لاہور کیمپس سے ڈگریاں نہ ملنے کے خلاف احتجاج کررہے ہیں ۔
دھرنے پر بیٹھے طلبہ و طالبات نے موقف اختیار کیا ہے کہ ڈگریاں جاری نہیں کی جارہیں ،تعلیمی سال ضائع ہورہا ہے ۔
دھرنے کو 8 گھنٹے گزرنے کے باوجود محکمہ تعلیم کا کوئی ذمہ دار یا ضلعی انتظامیہ میں سے کوئی بھی مذاکرات کےلئے نہیں آیا ۔
دوسری طرف یونیورسٹی پل پر چنگچی رکشا ڈرائیوروں نے دھرنا دے رکھا ہے جو ٹریفک پولیس کے خلاف نعرے بازی کررہے ہیں۔