کراچی کے شربت والے کے بعد لاڑکانہ کا طالبعلم بھی ارب پتی نکلا

آج کا اخبار

اہم خبریں

07 اکتوبر ، 2018

کراچی (طلحہ ہاشمی) کراچی کے شربت والے کے بعد لاڑکانہ کا طالبعلم بھی ارب پتی نکلا ، اس کے نام سے کھولے گئے اکاؤنٹ میں 2سال میں ڈیڑھ ارب روپے کی ٹرانزیکشنز ہوئیں جبکہ اب بھی اس کے اکاؤنٹ میں 3؍ کروڑ روپے موجود ہیں ۔ طالبعلم نے اکاؤنٹ سے لاعلمی کا اظہار کیا ہے ۔ تفصیلات کےمطابق اورنگی ٹاؤن کے فالود اشربت والے شہری کی طرز پر ٹریڈ اکاؤنٹ کا ایک اور کیس سامنے آگیاہے، اس بار اندرون سندھ اکاؤنٹ کھولا گیا، لاڑکانہ کے ایک طالب علم کے نام پر بڑی کنسٹرکشن کمپنی نے اکاؤنٹ کھولا اور اس میں 2013-2014ء کے دوران ڈیڑھ ارب روپے کی ٹرانزیکشنز ہوئیں، اس اکاؤنٹ کی ایس ٹی آر یعنی سسپیشیس ٹرانسیکشن رپورٹ بھی فنانشل مانیٹرنگ یونٹ نے ایف آئی اے کو بھیجی تھی، جس طالب علم کے قومی شناختی کارڈ پر اکاؤنٹ کھولا گیااس سے ایف آئی اے نے تحقیقات شروع کردی ہیں جبکہ منی لانڈرنگ کیس کی تحقیقات کرنے والی جے آئی ٹی نےبھی اسے طلب کیا، ایف آئی اے کو دیئے گئے بیان میں طالبعلم نے اکاؤنٹ سے لاعلمی کا اظہار کیا ہے، اس اکاؤنٹ میں اس وقت بھی تین کروڑ روپے موجود ہیں۔دوسری جانب اورنگی ٹاؤن کے فالودے شربت والے قادر کے کیس میں بھی پیشرفت ہوئی ہے اور ایف آئی اے نے پشاور میں کارروائی کرکے 5؍ افراد کو حراست میں لے لیاہے، ذرائع بتاتے ہیں کہ پکڑے گئے پانچوں افراد حوالہ اور ہنڈی کا کام کرتے ہیں۔

تازہ ترین