فرمان الہی
نماز کے اوقات
تیرہویں چیف آف دی نیول اسٹاف انٹرنیشنل اسکواش چیمپئن شپ 2018 کا روشن خان جہانگیر خان اسکواش کمپلیکس میں آغازہوگیا، پہلے روز آٹھ میچز کھیلے گئے۔
تیرہویں چیف آف دی نیول اسٹاف اسکواش چیمپئن شپ 2018 کی افتتاحی تقریب آج روشن خان جہانگیر خان اسکواش کمپلیکس میں ہوئی، کے پی ٹی کے جنرل منیجر انجینئرنگ، ریئر ایڈمرل ساجد وزیر خان تقریب کے مہمان خصوصی تھے۔
ٹورنامنٹ ڈائریکٹر کموڈور حبیب الرحمن نے تقریب سے خطاب میں تفصیلات سے آگاہ کرتے ہوئے کہا کہ ٹورنامنٹ ’الوداعی طرز‘ پر کھیلی جائے گی اور ٹاپ 8 کھلاڑیوں کو دوسرے راؤنڈ میں کھیلنے کا موقع دیا جائے گا۔
چیمپئن شپ کا پہلا راؤنڈ آج شروع ہو چکا ہے جبکہ چیمپئن شپ 10 دسمبر کواختتام پذیرہوگی۔
انہوں نے بتایا کہ 24 کھلاڑی اس ٹورنامنٹ میں حصہ لے ر ہے ہیں جن میں سے نصف کا تعلق پاکستان سے جبکہ نصف بین الاقوامی کھلاڑی ہیں جن کا تعلق مصر، ایران، ہانگ کانگ، آئر لینڈ، ملائیشیا، میکسیکو، پرتگال اور قطر سے ہے۔
انہوں نے مزید کہا کہ حصہ لینے والے تمام کھلاڑی بین الاقوامی رینکنگ رکھنے والے کھلاڑی ہیں۔
ٹورنامنٹ ڈائریکٹر نے امید ظاہر کی کہ چیمپئن شپ ملک میں اسکواش کے فروغ میں مددگار ثابت ہوگی اور اس کھیل کی کھوئی ہوئی ساکھ بحال کرنے کی طرف پاک بحریہ کا ایک بڑا قدم ہوگی۔
کموڈور حبیب الرحمن نے اس میگا ایونٹ میں شمولیت اور معاونت پر کھلاڑیوں، آفیشلز اور اسپانسرزکے جوش و جذبے کی حوصلہ افزائی کی۔
چیمپئن شپ کے پہلے روز آٹھ میچز کھیلے گئے، پہلے راؤنڈ کا افتتاحی میچ پاکستان کے عماد فرید اور ملائیشیا کے ریان پاسکل کے درمیان کھیلا گیا اور جیت عماد فریدکے حصے میں آئی۔
دیگر میچز میں ہانگ کانگ کے تان منگ ہونگ نے پاکستان کے فراز محمد کو 6-11, 11-4, 11-4, 11-7 سے، مصرکے یوسف ابراہیم نے پاکستان کے اویس رشید کو 11-8, 11-2, 11-8 سے،پاکستان کے فرحان زمان نے ہم وطن خواجہ عادل مقبول کو 11-6, 11-5, 11-9 سے، ہانگ کانگ کے ہنری لیونگ نے پاکستان کے دانش اطلس خان کو 12-10, 11-4, 9-11, 11-5 سے، ہانگ کانگ کے کوان لائو نے آئرلینڈ کے نوید ملک ثابت کو 11-3, 11-7, 11-5 سے ، پاکستان کے ظاہر شاہ نے ہم وطن علی مجتبیٰ شاہ بخاری کو 11-6, 15-13, 11-7 سے اور آئرلینڈ کے ساجد زیریان جاہرومی نے ہانگ کانگ کے چی ہم وونگ کو 6-11, 11-5, 11-5, 11-7 سے شکست دی۔
پہلی چیف آف دی نیول اسٹاف انٹرنیشنل اسکواش چیمپئن شپ کا انعقاد 2000 میں 6ہزارامریکی ڈالر انعامی رقم کے ساتھ کیا گیا تھا۔ وقت کے ساتھ ساتھ انعامی رقم بڑھتی گئی اور امسال چیمپئن شپ کی انعامی رقم 18ہزار امریکی ڈالر رکھی گئی ہے۔
افتتاحی تقریب میں سول و ملٹری شخصیات ، اسپانسرز اور اسکواش کے سینئر کھلاڑیوں کی بڑی تعداد نے شرکت کی۔
