’’حمزہ شہباز کو گرفتار کرنے آئے ہیں‘‘

06 اپریل ، 2019

مسلم لیگ نون کے صدر میاں شہباز شریف کی لاہور کے علاقے ماڈل ٹاؤن میں واقع رہائش گاہ پر آج پھر نیب نے چھاپہ مارا ہے اس موقع پر ایڈیشنل ڈائریکٹر نیب چوہدری اصغر کا کہنا ہے کہ وہ حمزہ شہبازکو گرفتار کرنے آئے ہیں۔

ایڈیشنل ڈائریکٹر نیب چوہدری اصغر نے نون لیگ کے وکیل عطاء تارڑ اور میڈیا سے گفتگو کرتے ہوئے کہا کہ ہمارے پاس حمزہ کی گرفتاری کے وارنٹ موجود ہیں، ہم انہیں گرفتار کیے بغیر نہیں جائیں گے۔

انہوں نے مزید کہا کہ حمزہ شہباز پاکستان کے نامور سیاستدان ہیں، انہیں گھر کے باہر آنا چاہیے، نامور سیاستدان کی طرح برتاؤ کریں، دنیا دیکھ رہی ہے کہ نامور سیاستدان کس طرح کا برتاؤ کر رہے ہیں۔

ایڈیشنل ڈائریکٹر نیب نے مزید کہا کہ حمزہ شہباز کو کارکنوں اور دیواروں کے پیچھے نہیں چھپنا چاہیے، سب دیکھ رہے ہیں کہ وہ گرفتاری سے کیسے بھاگ رہے ہیں۔

ان کا کہنا تھا کہ ہم دہشت گرد نہیں، نہتے ہیں، ہمارے پاس کوئی بندوق بھی نہیں، صرف قانونی آرڈر کی تکمیل کے لیے آئے ہیں۔

ایڈیشنل ڈائریکٹر نیب کا مزید کہنا ہے کہ حمزہ شہباز پر بہت سارے الزامات ہیں، وہ منی لانڈرنگ میں ملوث ہیں، ان پر پاکستانیوں کے خون پسینے کی کمائی باہر لے جانے کا الزام ہے، پاکستان آگے نہیں بڑھ رہا لیکن کون آگے بڑھ رہا ہے سب دیکھ رہے ہیں۔

انہوں نے یہ بھی کہا کہ ہمارے پاس حمزہ شہباز کی گرفتاری کے وارنٹ موجود ہیں، گرفتاری کے لیے ہمیں گھر کے اندر جانے دیا جائے۔

واضح رہے کہ نیب کی ٹیم نے گزشتہ روز بھی شہباز شریف کی رہائش گاہ پر چھاپہ مارا تھا تاہم وہ کسی کو گرفتار نہیں کر سکی تھی۔

آج نیب کی ٹیم تیاریوں کے ساتھ دوبارہ شہباز شریف کے گھر پہنچی ہے، اس کے ہمراہ پولیس اہلکار بڑی تعداد میں موجود ہیں جن میں خواتین اہلکار بھی کافی تعداد میں شامل ہیں۔

نیب کی ٹیم اور پولیس اہلکاروں نے میاں شہباز شریف کی رہائش گاہ کو گھیرے میں لے رکھا ہے جبکہ وہاں مسلم لیگ نون کے کارکن بھی بڑی تعداد میں موجود ہیں۔

تازہ ترین