چھت میں وینٹی لیشن کا انتظام

چھتوں میں روشن دان یا ہوادان بنانے کا خیال صدیوں پر اناہے جو آپ کو بدھوں کی خانقاہوں اور قدیم عرب تعمیرات میں نظر آتاہے۔ مزاروں، بارگاہوں، گرجا گھروں اور مسجدوں کی چھتوں میں روشن دان تو لازمی تھے ہی، ساتھ میں یہ گھر وں کی ضرورت بھی تھے تاکہ گھر میں روشنی اور ہوا کا عمدہ انتظام ہو سکے ۔ صدیوں پہلے بھی ان کو اس طرح ڈیزائن کیا جاتاتھا کہ گرم ہوا باہر نکل جائے اور ٹھنڈی ہوا اند ررہ جائے، یعنی زمانہ قدیم کے لوگ بھی قدرتی ایئر کنڈیشن کےمزے لیتے تھے ۔ 1940ء کے زمانے میں جب بلڈنگ کوڈ اور بلڈنگ سائنس کی اختراع وجود میں آئیں تو پھر چھت کے اندر روشن دان بنانے کی مختلف اقسام بھی سامنے آئیں ۔

اگر آپ گھر کی تعمیر کرنے جارہے ہیں اور وینٹی لیشن سسٹم کے بارے میں جاننا چاہتے ہیں تو اس ضمن میں دو صورتیں ہیں۔ اگر آپ کا گھر سرد علاقے میں ہے تو وینٹی لیشن ایسی ہوکہ سرد ہوا باہر جائے اور گرم ہوا اند ر آسکے اور اگر آپ کا گھر گرم مرطوب علاقے میں ہے تو سسٹم اس کے برعکس ہو۔ آپ کی رہنمائی کیلے روف وینٹی لیشن کی اقسام ذیل میں دی جارہی ہیں۔

ونڈ ٹربائن وینٹ

اس کے حصے گھومنے والے یا حرکت کرنے والے ہوتے ہیں لیکن یہ بجلی کے بجائے ہوا سے حرکت کرتے ہیں۔ اگر ہوا تیزاور مستقل چل رہی ہوتو ونڈٹربائن (Wind Turbine) وینٹ زبردست کام کرتے ہیں۔ یہ گھر کے اندر سے گرم ہوا باہر پھینک کر نمی لاتے ہیں لیکن اگر ہوا نہ چل رہی ہو تو یہ بالکل باکس وینٹ کی طرح کام کرتے ہیں۔ ہوامیں نمی کی وجہ سے یہ جلد خراب ہوجاتے ہیں، اس لئےبہتر ہوگا کہ بال بیئرنگ والے ٹربائن استعمال کیے جائیں اور ان میں باقاعدگی سے تیل ڈالا جائے یا پھر پلاسٹک بُشنگ کا استعمال کیا جائے۔

باکس وینٹ 

ڈبے نما اس وینٹ کے حصے حرکت نہیں کرتے بلکہ ایک جگہ ساکن رہتے ہیں۔ یہ دراصل چھت میں بنے سوراخ پر فکس کردیے جاتے ہیں۔ ضرورت کے مطابق استعمال کرنے کے لیے باکس وینٹ (Box Vent) کو ڈبے کی طرح کھولا اور بند کیا جاسکتا ہے۔ یہ عام طور پر سخت پلاسٹک کے بنے ہوتے ہیں لیکن مختلف دھاتوںمیں بھی دستیاب ہوتے ہیں۔ ویسے تو یہ چھت میں کہیں بھی نصب ہوجاتے ہیں لیکن یہ زیادہ اثرپزیر اس وقت ہوتے ہیں جب انہیں ڈھلان میں یا چھت اور دیوار کے ملنے والے جوڑ میں لگایاجائے۔

پاور وینٹ

پاور وینٹ (Power Vent) بجلی سےچلتا ہے اورآپ کے گھرسے گرم ہوا باہر پھینکنے کیلئے اپنے بڑے پنکھوں پر انحصار کرتا ہے۔ یہ بھی بہت سے رنگوں میں دستیاب ہوتا ہے تاکہ چھت کے رنگ سے اس کا بہتر امتزاج بن سکے۔ اس میں کچھ جدید فیچرز بھی شامل ہو چکے ہیں،جو زیادہ فائدہ مند ثابت ہورہےہیں۔ ایک فیچر اس میں ایڈجسٹ ہونےو الا تھرمو اسٹیٹ بھی ہے، جو کمرے کا درجہ حرارت برقرار رکھنے میں مدد دیتاہے۔

رِج وینٹ

رِج وینٹ (Ridge Vent) بھی فکس ہوتاہے اوراس کے حصے حرکت نہیں کرتے۔ ٹربائن یا باکس وینٹ کے برخلاف یہ بہت لمبے ہوتے ہیں جوکہ عمودی انداز میں لگائے جاتے ہیں۔ انہیں لگانا مشکل ہوتا ہے،لیکن اگر یہ درست تناسب میں لگ جائیں توآپ کیلئے بہترین ثابت ہوتے ہیں۔ یہ اپنے سائز کی وجہ سے بہت کارآمد اور پائیدار ہیں۔ ان سے آپ کی چھت کی زندگی بھی طویل ہوتی ہے اور یہی ان کے انتخاب کی سب سے بڑی وجہ ہے۔

کپولاوینٹ

کپولا وینٹ (Cupola Vent)بہت دلکش دکھائی دیتے ہیں، یہ عموماً آرائشی نقطہ نگاہ سے استعمال میںآتے ہیں۔ اس وینٹ کو آپ اونچی دیواروں پر تکونی چھت کے دونوں حصوں کے ملنے والی جگہ پر لگا سکتے ہیں۔ یہ روف وینٹ کا کام تو کرتےہی ہیں لیکن گھر میںلگے دیگر وینٹی لیشن سسٹم کی بھی مدد کرتے ہیں۔ ان پر زیادہ بھروسہ نہیں کیا جاسکتاکیونکہ یہ درج بالا وینٹنگ سسٹمز جیسی خصوصیت نہیں رکھتے ۔

گرین ہاؤس وینٹ

یہ عام گھروں کے بجائے گرین ہاؤسز میں لگائے جاتے ہیں، جو مکمل طور پرکھلے ہوتے ہیں تاکہ انہیں تمام تر ماحولیاتی عناصر حاصل ہوں۔ اگر گرمی کی شد ت کم یا زیادہ کرنا ہوتو اسے ہاتھ سے کھولنا یا بند کرنا پڑتاہے۔ یہ حجم میں بہت بڑے ہوتے ہیں اس لیے گھر کے درجہ حرارت میں اضافہ یا کمی تیزی سے ہوتی ہے۔ اگر آپ کے گھر میں کوئی کمرہ گرین ہائوس کی شکل اختیار کئے ہوئے ہے تو آپ اس وینٹی لیشن سسٹم کا استعمال کرسکتے ہیں۔ اس کے ذریعے پودوں کی زندگی بھی محفوظ رکھی جاسکتی ہے لیکن اس کیلئے آپ کو درجہ حرارت کی درجہ بندی کا بہت خیال رکھنا پڑے گا۔