ٹوئٹر پر شاہد آفریدی اور گوتم گمبھیر کی لفظی جنگ

29 اگست ، 2019

ٹوئٹر پر شاہد آفریدی اور گوتم گھمبیر کی لفظی جنگ

قومی کرکٹ ٹیم کے سابق کپتان شاہد آفریدی کے کشمیر سے متعلق ٹوئٹ پر سابق بھارتی کرکٹر گوتم گمبھیر نے بےتکا جواب دے دیا جس پر دونوں میں لفظی جنگ جاری ہے۔

شاہد آفریدی نے ٹوئٹ میں اپنے مداحوں سے کہا کہ وہ کشمیریوں سے اظہار یکجہتی کے لیے وزیراعظم کی کال پر عمل کریں۔ انہوں نے اپنے ٹوئٹ میں ایل او سی کے دورےکا بھی اعلان کیا تھا۔

اس ٹوئٹ پر بھارتی سابق ٹیسٹ کرکٹر اور بھارتیہ جنتہ پارٹی(بی جے پی) کا حصہ گوتم گمبھیر نے اپنے خیالات کا اظہار بڑے عجیب انداز میں کیا۔

انہوں نے اپنے ٹوئٹ میں شاہد آفریدی کی ایک تصویر شیئر کی جس میں انہیں بچکانہ کہہ دیا۔

گوتم گمبھیر کے اس ٹوئٹ کے بعد جہاں سوشل میڈیا صارفین کی جانب سے انہیں مذاق کا نشانہ بنایا جارہا ہے وہیں شاہد آفریدی بھی پیچھے نہ رہے اور انہیں کرارا جواب دے ڈالا۔

گوتم گمبھیر کے ٹوئٹ کی جوابی کارروائی میں شاہد آفریدی نے مزاحیہ انداز میں اُن کی طرح کا بےتُکا جواب دینے کی کوشش میں لکھا کہ ’کراچی میں موسم تبدیل ہورہا ہے ، ہوا میں بارش کی خوشبو ہے اور جب گوتم گھمبیر اپنے آپ کو بامقصد ثابت کرنے کی کوشش کرتے ہیں مجھے ایک چیز یاد آجاتی ہے ۔

شاہد آفریدی نے اپنے ٹوئٹ میں منسلک تصویر میں بھارتی کرکٹ ٹیم کے سابق مینٹل کنڈیشننگ کوچ پیڈی اپٹن کا ایک بیان شیئر کیاجس میں انہوں نے گوتم گھمبیر کو عدم تحفظ کا شکار اور کمزور ذہنیت کا حامل قرار دیا تھا ۔

دونوں ملکوں کے کرکٹرز کی جانب سے کئے جانے والے ٹوئٹس میں ٹوئٹر صارفین بھی اپنے اپنے ملک کے کرکٹرز کی حمایت میں ٹوئٹس کئے جا رہے ہیں اور پاکستان کے ٹوئٹر ٹرینڈ پینل میں گوتم اور آفریدی کا نام بھی شامل ہے ۔

واضح رہے کہ اس سے قبل بھی گوتم گمبھیر اور شاہد آفریدی ٹوئٹر پر اس طرح آمنے سامنے آمنے سامنے آچکے ہیں۔