تیزگام حادثہ، شیخ رشید کی دروغ گوئی پر مرتضیٰ وہاب کا ردعمل

31 اکتوبر ، 2019

تیزگام حادثے پر شیخ رشید کی دروغ گوئی پر ترجمان سندھ حکومت بیرسٹر مرتضیٰ وہاب نے ردعمل کا اظہار کرتے ہوئے کہا ہے کہ شیخ رشید کی نااہلی کے لیئے قوم کو مزید حادثوں کا منتظر ہونا پڑے گا۔

بیرسٹر مرتضیٰ وہاب نے کہا کہ شیخ رشید تو علاقہ کونسلر کی اہلیت نہیں رکھتے اور ان کو ریلوے کی وزارت دے دی گئی، پاکستانی قوم شیخ رشید سے اب تک کے ریلوے حادثات کا احتساب مانگ رہی ہے۔

انہوں نے کہا کہ جس شخص کی زندگی باتوں سے آگے نہیں بڑھی اسے ریلوے کی اہم وزارت سے نوازا گیا ۔اخلاقی گراوٹ کی حد ہے کہ حادثہ کے متاثرین کو ہی موردِ الزام ٹھہرایا جارہا ہے۔

مرتضیٰ وہاب نے کہا کہ ماضی میں عمران خان کہتے تھے کہ حادثے پر ریلوے کے وزیر کو اخلاقی طور پر مستعفی ہونا چاہئے۔ تمام ریلوے اسٹیشنز پر اسکینگ مشینیں ناکارہ اور غیر فعال ہیں۔

ریلوے کے وزیر کو ریلوے سے زیادہ اپنی سیاسی دکان داری کی فکر ہے۔ وہ امدادی کاروائیوں کے بجائے الزام تراشی کی بیان بازی میں مصروف عمل ہیں۔

تازہ ترین