کراچی میں ڈینگی سے مزید 2 جاں بحق، خیبر پختون خوا میں مرض میں کمی

23 نومبر ، 2019

شہرِ قائد میں ڈینگی وائرس سے متاثرہ مزید 2 افراد جان کی بازی ہار گئے جس کے بعد سندھ میں رواں سال ڈینگی سے متاثرہ ہو کر جاں بحق ہونے والے افراد کی تعداد 38 ہو گئی ہے۔

کراچی میں ڈینگی وائرس سے متاثرہ جاں بحق ہونے والے 2 افراد میں کورنگی سے تعلق رکھنے والا 40 سالہ شہزاد اور شاہ فیصل کالونی کا رہائشی 60 سالہ عبدالرافع شامل ہیں۔

ان ہلاکتوں کے بعد رواں سال کراچی سمیت صوبے بھر میں ڈینگی سے متاثر ہو کر جاں بحق ہونے والے افراد کی تعداد 38 تک جا پہنچی ہے۔

رواں سال سندھ میں 14 ہزار 317 افراد ڈینگی میں مبتلا ہوئے تھے جبکہ کراچی میں ڈینگی سے متاثرہ افراد کی تعداد 13 ہزار 330 ہے۔

بلوچستان میں ڈینگی کی صورتِ حال

ادھر بلوچستان کے ضلع لسبیلہ میں گزشتہ 2 روز کے دوران ڈینگی وائرس کے 4 کیسز رپورٹ ہوئے ہیں۔

بلوچستان بھر میں رواں سیزن کے دوران ڈینگی وائرس کے کیسز کی تعداد تین ہزار 174 ہو گئی ہے، کیچ میں سب سے زیادہ 1766 کیسز رپورٹ ہو چکے ہیں۔

صوبائی محکمۂ صحت کے حکام کے مطابق لسبیلہ میں ڈینگی وائرس کے کیسز کی تعداد 408 ہو گئی ہے، اس وقت وائرس سے متاثرہ 3 مریض اسپتال میں زیرِ علاج ہیں۔

حکام کے مطابق بلوچستان میں رواں سیزن کے دوران ڈینگی وائرس کے 3 ہزار ایک سو 74 کیسز رپورٹ ہو چکے ہیں، جن میں سے زیادہ کیسز ضلع کیچ کے مختلف علاقوں سے رپورٹ ہوئے ہیں۔

کیچ میں ڈینگی کے 1766 کیسز رپورٹ ہو چکے ہیں، جبکہ گوادر میں ڈینگی وائرس کے 942 کیسز رپورٹ ہوئے ہیں۔

وائرس میں مبتلا 3 مریضوں کی موت واقع ہوئی ہے، جن کا تعلق کیچ سے تھا، اس کے علاوہ فاطمہ جناح اسپتال کوئٹہ میں بھی ڈینگی وائرس کے 59 کیسز رپورٹ ہوچکے ہیں۔

اسپتال انتظامیہ کے مطابق اسپتال لائے گئے تمام مریض کراچی یا دیگر علاقوں سے سفر کر کے کوئٹہ آئے تھے۔

یہ بھی پڑھیئے: کراچی میں ڈینگی وائرس نے ایک اور جان لے لی

محکمۂ صحت کے حکام کے مطابق پہلے کی نسبت صوبے میں ڈینگی کے کیسز کی صورتِ حال میں کمی آئی ہے۔