’گائے کو چھونے سے منفی سوچ دور ہوتی ہے‘، بھارتی وزیر

13 جنوری ، 2020

نو منتخب بھارتی وزیر نے منفی سوچ دور بھگانے اور پیار محبت کا احساس جگانے کے لیے عجیب منطق پیش کر دی ۔

یہ بھی پڑھیے: تیسری جنگ عظیم کا آغاز گائے کی وجہ سے ہوگا، بھارتی ہندوگرو کا دعویٰ

سیاسی جماعت کانگریس سے تعلق رکھنے والی بھارتی ریاست مہاراشٹرا کی نو منتخب وزیریشو متی ٹھاکر کا کہنا ہے کہ’ گائے سب جانوروں میں مقدس ہے، جسے چھونے سے محبت کا احساس جاگتا ہے جبکہ منفی سوچ کا خاتمہ ہوتا ہے ۔‘

بھارتی رہنما کے اس بیان کے بعد ایک اور سیاستدان نے ان کے اس بیان کی تائید کرتے ہوئے کہا کہ ’ گائے سمیت سب ہی جانوروں کو چھونے سے انہیں اچھا محسوس ہوتا ہےاور یہ ان کی ثقافت کا حصہ ہے۔‘

دونو ں سیاست دانوں کو عوام کی جانب سے تنقید کا سامنا کرنا پڑا تھا۔

واضح رہے کہ بھارتی کانگریس جماعت کی سیاست دان یشومتی اس قسم کے بیانات دینے کے لیے مشہور ہیں ، اس بیان سے پہلے انہوں نے ایک انتخابی مہم کے دوران اپنے ایک بیان میں کہا تھا کہ ’ ہمیں جیت کر حکومت میں آنا ہے، مگر ہماری جیبیں خالی ہیں۔‘

اس سے قبل ایک بھارتی افسر نے انوکھی منطق پیش کرتے ہوئے کہا تھا کہ گائے کا گوبر انہیں ایٹمی حملے کے بعد جوہری تابکاری کے اثرات سے محفوظ رکھے گا۔

انہوں نے کہا تھا کہ کھائی کھودیے، اس کے اوپر لکڑی کی بَلیاں رکھیے، پتے رکھیے اور اس کے اوپر گائے کے گوبر کی ڈیڑھ فٹ تک کی تہہ لگا دیں تو بھارت جوہری تابکاری سے بچ جائے گا، ناسا نے اس کی تصدیق بھی کر دی ہے۔