فرمان الہی
نماز کے اوقات
سکھر (بیورو رپورٹ) مختلف تنظیموں کی جانب سے سکھر، روہڑی سمیت گرد و نواح کے علاقوں میں کشمیریوں سے اظہار یکجہتی کے لئے ریلیاں نکالی گئیں، شرکاء نے مختلف شاہراہوں پر گشت کیا، کشمیر بنے گا پاکستان، کشمیر سے رشتہ کیا، لا الہ الا اللہ کے نعرے بلند کئے، شرکاء نے ہاتھوں میں پلے کارڈ، بینرز، پاکستانی و کشمیری پرچم بھی اٹھا رکھے تھے۔ جناح و یلفیئر ایسوسی ایشن کی جانب سے اصلاح الدین شیخ، پاکستان سنی تحریک کے مولانا رضوان قادری کی قیادت میں جناح چوک سے ریلی نکالی گئی، پاکستان غریب عوام پارٹی سکھر کی جانب سے اشفاق بھٹی، وقار کی قیادت میں واری تڑ سے دادو چوک تک ریلی نکالی گئی جبکہ سول سوسائٹی کی امام الدین محمدانی، نصیر گوپانگ کی قیادت میں مائکرو کالونی سے قریشی گوٹھ تک کشمیریوں سے اظہار یکجہتی کے لئے ریلی نکالی گئی۔ ریلیوں سے خطاب کرتے ہوئے مقررین نے کہاکہ پوری دنیا دیکھ رہی ہے کہ بھارت کشمیر میں اس طرح ظلم و ستم کے پہاڑ توڑ رہا ہے مگر اس کے تمام مظالم کے باوجود کشمیریوں کا جذبہ حریت کم نہیں ہوسکا ہے، کشمیری آزادی سے کم کسی بھی چیز پر سمجھوتہ کرنے کو تیار نہیں، وقت آگیا ہے کہ عالمی برادری بھارتی مظالم کا نوٹس لیکر کشمیریوں کا ان کا حق خود ارادیت دلانے میں اپنا کردار ادا کریں۔
