بینظیر انکم سپورٹ کی جگہ احساس کفالت پروگرام لانے کا فیصلہ

اسلام آباد (نمائندہ جنگ)حکومت نے بینظیر انکم سپورٹ پروگرام کی جگہ احساس کفالت پروگرام لانے کا فیصلہ کیا ہے جس کا اجراءکل جمعہ (31جنوری) کو وزیراعظم عمران خان کنونشن سنٹر اسلام آباد میں کرینگے۔

احساس کفالت کارڈ پر بینظیر بھٹو کی جگہ قائداعظم کی تصویر ہوگی ، 70لاکھ مستحق خواتین شامل،سہ ماہی وظیفہ بڑھا کر چھ ہزارروپےکردیاگیا ،10لاکھ گھرانوں کا اندراج شروع ہوچکا، وظائف فروری ، مارچ سے ملنا شروع ہوجائینگے،بلاسودقرضے بھی دئیے جائینگے۔

وزیراعظم کی معاون خصوصی برائے سماجی تحفظ و تخفیف غربت ڈاکٹر ثانیہ نشترکے مطابق احساس کفالت پروگرام پر کسی سیاسی شخصیت کے بجائے قائداعظم محمد علی جناح کی تصویر ہوگی،احساس کفالت پروگرام 70لاکھ مستحق غریب خواتین کیلئے شروع کیاجارہاہے ۔

جس میں بی آئی ایس پی کی 44لاکھ مستحق خواتین بھی شامل ہونگی ، پروگرام کے تحت سہ ماہی وظیفہ بڑھا کر چھ ہزار روپے کر دیا گیا جوماہانہ بنیادوں پر 2ہزار روپے کے حساب سےدیا جائیگا ۔

ہر مستحق خاتون کاایک سیونگ بنک اکائونٹ ہوگا، صحافیوں کو بریفنگ دیتے ہوئے ڈاکٹر ثانیہ نشتر نے کہا کہ نئے سروے کے تحت ملک کے 70اضلاع میں 10لاکھ گھرانوں کے اندراج کا عمل شروع ہو چکا ہے ۔