فرمان الہی
نماز کے اوقات
مسلم لیگ (ن) کی ترجمان مریم اورنگزیب نے کہا ہے کہ نیب نیازی گٹھ جوڑ نے 2 سال الزامات کا پہاڑ کھودا، جس میں سے مرا ہوا بدبو دار چوہا نکلا۔
مسلم لیگ (ن) کی ترجمان مریم اورنگزیب کی جانب سے وزیراعظم کے معاون خصوصی شہزاد اکبر کے بیان پر رد عمل سامنے آگیا۔
اپنے ایک بیان میں مریم اورنگزیب کا کہنا تھا کہ نیب نیازی گٹھ جوڑ نے 2 سال الزامات کا پہاڑ کھودا، جس میں سے 49 لاکھ کے الزام کا مرا ہوا بدبو دار چوہا نکلا۔
مریم اورنگزیب کا کہنا تھا کہ مسلم لیگ (ن) کے صدر شہباز شریف سالانہ 8 کروڑ روپے انکم ٹیکس ادا کرتے ہیں۔
لیگی ترجمان کا کہنا تھا کہ شہباز شریف پر 49 لاکھ کا مضحکہ خیز الزام لگانے پر نیب نیازی گٹھ جوڑ کو ڈوب مرنا چاہے۔
ان کا کہنا تھا کہ شہباز شریف نے بطور وزیرِاعلی کروڑوں روپے کا استحقاق چھوڑنے والے شہباز شریف پر 49 لاکھ کا الزام لگایا گیا؟
انہوں نے مزید کہا کہ منصوبوں میں اربوں کی بچت کرنیوالے شہباز شریف پر 49 لاکھ کا الزام احتساب کے جنازے کی فاتحہ ہے۔
یہ بھی پڑھیے: شہباز کی کرپشن کے کردار بھی سامنے آچکے ہیں، شہزاد اکبر
لیگی ترجمان نے کہا کہ اربوں کھربوں روپے کے الزامات لگانے والے اب 49 لاکھ کے الزام تک آپہنچے ہیں۔
مریم اورنگزیب نے کہا کہ وزیراعظم عمران خان کا کرپشن کا جھوٹا بیانیہ اب نہیں بک رہا، احتساب کے ٹھیکیداروں کو چار چیلنج دیے تھے، جن کا اب تک جواب نہیں آیا۔
ان کا کہنا تھا کہ نیب نیازی گٹھ جوڑ کو آج شہباز شریف کی کرپشن کا ثبوت لانا تھا؟ عوام تو وہ سننا اور دیکھنا چاہتے تھے؟
انہوں نے کہا کہ ناکام، شرمندہ اور ہارے ہوئے ٹولے کا شریف خاندان اور مسلم لیگ (ن) کے خلاف کرپشن کا بیانیہ جھوٹ ثابت ہوچکا ہے۔
مریم اورنگزیب کا کہنا تھا کہ حکومت عوام کی خدمت کے امتحان میں فیل ہوچکی ہے، کرپشن میں رنگے ہاتھوں پکڑی جاچکی ہے، اس لیے سیاسی مخالفین کا میڈیا ٹرائل جاری ہے۔
یہ بھی پڑھیے: پی ٹی آئی کے فنڈز کا ریکارڈ کہاں ہے، عظمیٰ بخاری
لیگی ترجمان کا کہنا تھا کہ عمران خان کی آٹا اور چینی چوری کی ڈکیتی کی رپورٹ چھپائی جارہی ہے، اس لیے نیب نیازی گٹھ جوڑ ہر روز تماشا لگاتا ہے۔
انہوں نے کہا کہ کمپنیز آرڈیننس میں ترمیم کے ذریعے نئی ڈکیتی سے عوام کی توجہ ہٹانے کے لیے آج کی پریس کانفرنس کی گئی۔
ان کا کہنا تھا کہ عمران خان کے اربوں روپے کے 23 خفیہ اکاؤنٹس، فارن فنڈنگ، مالم جبہ، ہیلی کاپٹر کیسز میں کرپشن ہوئی، اس کا حساب دیں۔
انہوں نے کہا کہ بلین ٹری سونامی، 100 ارب کے بی آر ٹی کھڈوں، 500 ارب آٹا چینی اور 580 ارب سے زائد ادویات کے ڈاکے کا حساب دیں۔
ان کا کہنا تھا کہ عمران خان فارن فنڈنگ کے وہ چیک پیش کریں جس پر ان کے دستخط ہیں اور ان کی چوری اسٹیٹ بینک کے ریکارڈ کا حصہ ہے۔
مریم اورنگزیب نے کہا کہ وزیراعظم عمران خان کی منی لانڈرنگ، حوالہ اور ہنڈی کا الیکشن کمیشن میں چھپایا گیا ریکارڈ عوام کے سامنے کیوں پیش نہیں کیا جارہا؟
لیگی ترجمان کا کہنا تھا کہ عمران خان پی آئی ڈی میں شہباز شریف کا سرکاری خرچ پر روزانہ میڈیا ٹرائل کرنے سے آپ کی کرپشن اور نالائقی چھپ نہیں سکتی۔
مریم اورنگزیب کا کہنا تھا کہ عدالتوں میں ثبوت نہ دینے والی ناکام شکلیں سرکاری خرچ اور سرکاری عمارتوں میں الزامات کے سرکس سے عوام کو دھوکہ نہیں دے سکتیں۔
