فرمان الہی
نماز کے اوقات
خوبصورت، لمبے اور گھنے بال ہر مرد اور عورت کی خواہش ہوتی ہے مگر مختلف برانڈ کے کیمیکل والے شیمپو بالوں کو روکھا بنا دیتے ہیں، اگر آپ بھی بالوں کے مسائل کا شکار ہیں تو کیمیکل والے شیمپو سے جان چھڑائیں اور گھر میں آسان ترین طریقوں سے اپنا شیمپو خود بنائیں۔
جڑی بوٹیوں سے علاج کرنے والے ماہر ہربلسٹس کا کہنا ہے کہ جس طرح چہرے کی جلد اضافی چکناہٹ کی وجہ سے کئی مسائل کا شکار رہتی ہے اسی طرح سر کی جلد بھی اضافی تیل آنے سے دنوں میں گندی ہونے لگتی ہے جس کی وجہ سے خشکی، خارش اور بالوں کا کمزور ہو کر گرنے کا عمل شروع ہو جاتا ہے ۔
ایسی صورتحال میں مصروف زندگی سے تنگ افراد اس کا کوئی صحت مند حل نکالنے کے بجائے بالوں کی صفائی کے لیے روزانہ کی بنیاد پر بال شیمپو کرنے لگتے ہیں جس کے نتیجے میں سر کی جلد سے قدرتی چکناہٹ بھی ختم ہو جاتی ہے اور بال روکھے، بے جان اور پتلے ہو جاتے ہیں ۔ بالوں کو نشو نما کے لیے دیکھ بھال کی ضرورت ہوتی ہے ، لازمی ہے کہ ہر شیمپو سے پہلے بالوں کی جڑوں سے سروں تک تیل لگایا جائے مگر وقت کی کمی کے باعث ایسا کوئی نہیں کرتا۔
ماہرین کے مطابق مارکیٹ سے ملنے والے مختلف برانڈز کے شیمپو میں کئی کیمیکل ہوتے ہیں جو بالوں کو وقتی چمک دے کر نہیں اندر سے نقصان پہنچا رہے ہوتے ہیں، ان کیمیکل ملے شیمپو سے بچنے کے لیے اپنے بالوں کی فطرت کے مطابق گھر میں بنے خشک شیمپو کا استعمال کرتے ہوئے بالوں کو وقت سے پہلے گرنے سے بچایا جا سکتا ہے ۔
نارمل سے خشک بالوں کے لیے
2 چائے کے چمچ مکئی کا آٹا اور 2 چائے چمچ کوکوا پاؤڈر کو اچھی طرح ملا لیں ، اب اس میں 10 قطرے گلاب کے تیل کے ڈالیں، اب میک برش کی مدد سے بالوں میں لگائیں اور چند منٹوں کے لیے مساج کریں ، اب بالوں کو سلجھا لیں اور جیسے چاہے ہیئر اسٹائل بنائیں، بال صاف ستھرے اور صحت مند نظر آئیں گے ۔
نارمل سے آئلی بالوں کے لیے
2 چائے کے چمچ پسا ہوا دلیہ اور 20 چائے کے چمچ سفید آٹا لے لیں ، اب اس میں 5 قطرے ’یوکلپٹس کا تیل‘ سفیدے کا تیل ملا لیں ، اس خشک شیمپو کو بھی برش کی مدد سے بالوں کی جڑوں میں لگائیں اور مساج کرتے ہوئے بال صاف کر لیں ۔
خشکی کا شکار بالوں کے لیے
اگر آپ کے بال خشکی کا شکار ہیں تو ا س سے نجات حاصل کرنے کے لیے 2 چائے کے چمچ اروِی ( اروی سبزی) پاؤڈر ،1 چائے کا چمچ میتھی بیج کا پاؤڈر، ایک چائے کا چمچ ایکٹیو چارکول پاؤڈر ، 10 قطرے ٹی ٹری تیل لے لیں ، اب ان سب اجزا کو مکس کر لیں اور برش کی مدد سے بالوں پر لگائیں، مساج کریں اور بال صاف کر لیں ۔
خارش زدہ جلد کے لیے خشک شیمپو
2 چائے کے چمچ ملتانی مٹی میں ایک چائے کا میٹھا سوڈا ملا لیں، اب اس میں 10 قطرے لیوینڈر کا تیل ملائیں اور اچھی طرح سے مکس کر کے بالوں پرلگائیں۔
بالوں کو کالا کرنے کے لیے خشک شیمپو
بالوں کو کالا کرنے کے خواہش مند ہیں تو ان پر اروی اور چارکول کے خشک شیمپو کا استعمال کریں ۔
اروی کے پاؤڈر کے 2 چمچ، ایک چمچ کوکوا پاڈر اور ایک چمچ ایکٹیو چارکول کا اچھی طرح سے ملا لیں، اب انہیں بالوں کی جڑوں پر لگائیں ، مساج کریں اور بال صاف کر لیں ۔
اس سے بال صاف ستھرے ، نرم ملائم اور خوبصورت ہو جائیں گے ۔
