رواں سال دنیا سے رخصت ہونے والے بالی ووڈ کے لیجنڈ اداکار عرفان خان کے بیٹے بابیل کا کہنا ہے کہ عالمی سنیما میں بالی ووڈ کا ذکر شاذو نادر ہی ہوتا ہے۔
والد کی وفات کے بعد سے بابیل سوشل میڈیا خصوصاً انسٹاگرام پر کافی فعال دکھائی دے رہے ہیں، کبھی والد کی یاد میں تصویریں تو کبھی اُن کی باتیں اور یادیں مداحوں کے ساتھ شیئر کرتے دکھائی دیتے ہیں۔
حال ہی میں انہوں نے والد کے ساتھ اپنے بچپن کی ایک یادگار تصویر شیئر کرتے ہوئے تفصیلی کیپشن دیا۔
انہوں نے اپنے کیپشن میں بالی ووڈ کی مبینہ خراب روایات کا ذکر کیا اور لکھا کہ عالمی سنیما میں بالی ووڈ کا ذکر کم ہی ہوتا ہے۔
انہوں نے حقیت سے پردہ اٹھاتے ہوئے لکھا کہ عالمی سنیما میں 90 کی دہائی کے بھارتی سنیما کے متعلق کوئی آگاہی نہیں ہے اور آج فلم کے نام پر جو لوگوں کو دکھایا جاتا ہے وہ حقیقت سے بلکل دور ہے۔
بابیل نے اپنے لوگوں اور بالی ووٖڈ پر کھلی تنقید کرتے ہوئے لکھا کہ بدقسمتی سے بھارتی ایسا ہی مواد دیکھنا چاہتے ہیں اور ناظرین اپنی سوچ اور ذوق بدلنے کے لیے تیار ہی نہیں ہیں۔
انہوں نے لکھا کہ والد نے اپنی تمام زندگی اداکاری اور فن کے معیار کو بلند کرتے گزار دی لیکن حقیقت سے دور ان فلموں میں جنس پرستی، پدرشاہی سوچ اور فوٹو شاپ آئٹم سانگز کے ساتھ جملے بازی کرتے سِکس پیک ایبس والے ہنکس نے باکس آفس پر میرے والد کو شکست دی ہے۔
اپنی پوسٹ کے آخر میں بابیل نے امید ظاہر کی کہ بالی ووڈ کو ایک تازہ ہوا کے جھونکے کی ضرورت ہے اور نئی نسل ایک تازہ ہوا کے جھونکے کی مانند ہے جو ان روایات کو تبدیل کرنے میں اہم کردار ادا کرنے کا جذبہ رکھتی ہے۔