کے الیکٹرک سے متعلق تحقیقاتی رپورٹ میں وزیر اعظم کا نام ہے، نفیسہ شاہ

16 جولائی ، 2020

پیپلزپارٹی کی نفیسہ شاہ کاکہنا ہے کہ پی آئی اے کو حکومت نے تباہ کردیا ، کے الیکٹرک سے متعلق تحقیقاتی رپورٹ میں بھی صرف ایک شخص کا نام ہے۔

قومی اسمبلی اجلاس میں اظہار خیال کرتے ہوئے پی پی رہنما نفیسہ شاہ نے کہا کہ کے الیکٹرک سے متعلق تحقیقاتی رپورٹ میں ابراج گروپ سے دوستی کے طور پر عمران خان کا نام ہے۔

انہوں نے کہا کہ ابراج گروپ سے کون ملتا رہا، کون فنڈنگ لیتا رہا، وہ وزیراعظم ہے، اس موقع پر حکومتی ارکان نے نفیسہ شاہ کی جانب سے وزیراعظم کا نام لینے پر شدید احتجاج کیا۔

نفیسہ شاہ نے اسمبلی میں کہا کہ پی آئی اے کو حکومت نے تباہ کردیا ہے ، ایک وفاقی وزیر نے قومی ایئرلائن اور پائلٹس کو بدنام کیا ہے جبکہ دیگر ایئر لائنز چل رہی ہیں۔

ان کاکہنا تھا کہ وفاقی وزیرکا بیان درست ہے یا ڈی جی سول ایوی ایشن کا؟ اگر ڈی جی سول ایوی ایشن نے غلط کہا ہے تو انہیں استعفیٰ دینا ہوگا، اگر ڈی جی سول ایوی ایشن کا بیان درست ہے تو وفاقی وزیر ہوا بازی مستعفی ہوں۔

پی پی رہنما کاکہنا تھا کہ وزیر ہوابازی کی غلط بیانی سے پاکستان کی عزت کو نقصان پہنچا ہے، ملک کواربوں کا نقصان ہوا، قومی ایئرلائن پر پابندی لگ گئی۔

نفیسہ شاہ کی تقریر کے دوران حکومتی بینچز سے احتجاج کیا گیا اور علی اعوان نے نفیسہ شاہ کی تنقید کا جواب دیتے ہوئے کہا کہ پی آئی اے پر وہ بات کر رہے ہیں جن میں سے ایک پارٹی نے جہاز اغوا کیا، جبکہ دوسری پارٹی نے جہاز بیچ دیا۔

تازہ ترین