آپ آف لائن ہیں
بدھ12؍ صفر المظفّر 1442ھ30؍ستمبر 2020ء
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
Jang Group

ایمنسٹی انٹرنیشنل کا بھارت سے مقبوضہ کشمیر میں غیرقانونی محاصرہ ختم کرنے کا مطالبہ

ایمنسٹی انٹرنیشنل نے بھی بھارتی حکومت کی جانب سے مقبوضہ کشمیر میں جاری غیر قانونی محاصرے کو ختم کرنے کا مطالبہ کردیا۔

مقبوضہ جموں و کشمیر کی خصوصی حیثیت کے خاتمے کا ایک سال مکمل ہونے پر جاری بیان میں ایمنسٹی انٹرنیشنل نے کہا کہ بھارت فوری طور پر جموں و کشمیر کا طویل غیر قانونی محاصرہ ختم کرے۔

ایمنسٹی انٹرنیشنل کا کہنا تھا کہ بھارت وادی کے گرفتار سیاسی رہنماؤں، صحافیوں اور سماجی کارکنوں کو رہا کرے۔

عالمی واچ ڈاگ نے کہا کہ مقبوضہ جموں و کشمیر میں انٹرنیٹ کی سہولیات بھی بحال کی جائیں۔

ایمنسٹی انٹرنیشنل نے مطالبہ کیا کہ بھارت جیلوں کو خالی کرے اور صحافیوں پر ہونے والے حملوں کی فوری تحقیقات کروائے۔

بیان میں کہا گیا ہے کہ گذشتہ ایک سال میں بھارت نے منظم انداز میں کشمیریوں پر انصاف کا ہر راستہ بند کر دیا۔ کشمیریوں کی آواز دبانے کے لیے ایک سال سے وادی میں انٹرنیٹ اور مقامی میڈیا پر پابندیاں ہیں۔

ایمنسٹی انٹرنیشنل نے اپنے بیان میں کہا کہ بھارت نے کشمیر میں مواصلات، نقل و حمل اور شخصی آزادی پر پابندیاں لگا رکھی ہیں۔

ایمنسٹی انٹرنیشنل کا کہنا تھا کہ بھارت کشمیریوں کے اظہار رائے کی آزادی چھین کر عالمی قوانین کی سنگین خلاف ورزیاں کر رہا ہے۔

عالمی واچ ڈاگ کا کہنا تھا کہ وادی کی اصل صورتحال دنیا سے چھپانے کے لیے بھارت نے کشمیر میں بھیانک میڈیا پالیسیاں نافذ کیں۔

اس نے مطالبہ کیا کہ بھارت فوری طور پر جموں و کشمیر میں نافذ نئی میڈیا پالیسی کو معطل کرے۔

بین الاقوامی خبریں سے مزید