کیماڑی کو ضلع بنانا وہاں کے لوگوں کا مطالبہ تھا، مرتضیٰ وہاب

ترجمان سندھ حکومت بیرسٹر مرتضیٰ وہاب کا کہنا ہے کہ یہ تاثر غلط ہے کہ کیماڑی ضلع سیاسی مفادات کے لیے بنایا گیا ہے، کیماڑی کو ضلع بنانا وہاں کے لوگوں کا مطالبہ تھا۔

مرتضیٰ وہاب نے اپنے ایک بیان میں کہا ہے کہ سندھ حکومت آئین و قانون کے مطابق تمام اقدامات کرتی ہے، سندھ حکومت جو فیصلہ کرےگی وہ عوام کے مفادات کے مطابق کرے گی، کل تک ایم کیو ایم والےخود کہتے تھے کہ سندھ ہماری ماں ہے، ان کے تمام ایجنڈے فیل ہوچکے ہیں۔

مرتضیٰ وہاب نے کہا ہے کہ ہم سب کو مل کر کام کرنے کی ضرورت ہے، وزیراعظم عمران خان نے کہا تھا کہ 162 ارب روپے کراچی کو دوں گا، ابھی تک یہ پیسےنظرنہیں آئے، وزیراعظم نے اسلام آباد میں بیٹھ کر حیدرآباد میں یونیورسٹی بنانے کا اعلان کیا تھا، وزیر اعظم نے سندھ کے حوالے سے بہت وعدے کیے تھے۔

انہوں نے مزید کہا کہ ان کا نعرہ تھا دو نہیں ایک پاکستان، پی ٹی آئی کا دہرا معیار ہے ، اندرون سندھ کے لیے پی ٹی آئی کے الگ اصول ہیں، جہاں پی ٹی آئی کی اپنی حکومت ہے وہاں مختلف اصول ہیں۔

مرتضیٰ وہاب کا کہنا تھا کہ یہ دہرا معیار نہیں چلے گا، پورے ملک میں ایک اصول ہوناچاہیے، دہرا معیار نہیں رکھا جاناچاہیے، سندھ کے لیے معیار کچھ اور اور پنجاب کے لیے کچھ اور معیار۔

مرتضیٰ وہاب نے وفاقی حکوت پر تنقید کرتے ہوئے کہا ہے کہ لاہور میں بارش کے بعد کی صورتحال سب نے دیکھی، لاہور کے اسپتالوں میں بارش کا پانی آگیا، بزدار صاحب کہیں نظر نہیں آئے، یہ بھی نظر نہیں آیا کہ وزیراعظم نے این ڈی ایم اے کو لاہور میں صفائی کی ہدایات کی ہوں۔

مرتضیٰ وہاب کا کہنا تھا کہ کوئی نہیں کہتا لاہور کو تباہ کر دیا گیا ہے، یہ وہ لوگ ہیں جنہوں نے گدھوں کے لیے بھی مشکلات کھڑی کردی ہیں۔