فرزانہ راجہ سمیت 18 ملزمان 17 ستمبر کو طلب

25 اگست ، 2020

اسلام آبادکی احتساب عدالت نے بے نظیر اِنکم سپورٹ پروگرام فنڈز میں مبینہ خورد برد کے ریفرنس میں پی پی پی رہنما فرزانہ راجہ سمیت 18 ملزمان کو 17 ستمبر کو طلب کر لیا۔

احتساب عدالت اسلام آباد کے جج محمد بشیر نے ریفرنس کی سماعت کرتے ہوئے فرزانہ راجہ کی میڈیکل رپورٹس بھی طلب کر لیں۔

بےنظیر اِنکم سپورٹ پروگرام کی سابق چیئرپرسن فرزانہ راجہ عدالت میں پیش نہ ہوئیں، ان کی جانب سے سردار عصمت اللّٰہ نے وکالت نامہ داخل کرا دیا۔

سردار عصمت اللّٰہ ایڈووکیٹ نے عدالت کو بتایا کہ سابق چیئرپرسن بی آئی ایس پی فرزانہ راجہ بیمار ہیں، امریکا میں زیرِ علاج ہیں، وہ ویڈیو لنک سے عدالت میں حاضری لگوانا چاہتی ہیں۔

یہ بھی پڑھیئے:۔

سابق چیئرپرسن BISP فرزانہ راجہ یکم جون کواحتساب عدالت طلب

احتساب عدالت کے جج محمد بشیر نے حکم دیا کہ پہلے ملزمہ کی بیماری سے متعلق میڈیکل رپورٹ عدالت میں جمع کرائیں، میڈیکل رپورٹ دیکھنے کے بعد ہی عدالت کوئی فیصلہ کرے گی۔

واضح رہے کہ فرزانہ راجہ سمیت دیگر ملزمان پر فنڈز میں خورد برد سے قومی خزانے کو 54 کروڑ روپے کا نقصان پہنچانے کا الزام ہے۔

تازہ ترین