عروہ اور فرحان سعید کی ملاقات کیسے ہوئی تھی؟

پاکستانی فلم و ڈرامہ انڈسٹری کی اداکارہ عروہ حسین نے انکشاف کیا ہے کہ جب وہ اپنے شوہر اور پاکستانی گلوکار فرحان سعید سے پہلی بار ملی تھیں تو اُنہیں جانتی نہیں تھیں کہ وہ بھی ایک معروف شخصیت ہیں۔

پاکستان کی خوبرو اور باصلاحیت اداکار بہنیں ماورا اور عروہ حسین کی سوشل میڈیا انسٹاگرام پر ایک ویڈیو وائرل ہو رہی ہے جس میں وہ انٹرویو کے دوران دلچسپ رازوں سے پردہ اُٹھا رہی ہیں ۔

وائرل ویڈیو میں عروہ حسین بتا رہی ہیں کہ وہ اپنے شوہر سے پہلی بار کیسے ملی تھیں۔

فرحان سے پہلی بار ملنے کی دلچسپ کہانی بتاتے ہوئے عروہ نے بتایا کہ ’وہ فرحان سعید سے اپنی پہلی فلم کے سیٹ پر ملی تھیں اور دونوں کی اچھی  بات چیت ہو گئی تھی، کمیسٹری بھی اچھی رہی تھی، اُنہوں نے فرحان کے ساتھ خوشگوار ملاقات کا تذکرہ  اپنی کچھ دوستوں کے ساتھ بھی شیئر کیا تھا۔‘

یہ بھی پڑھیے: ماورا حسین نے اپنے نام کے آخری حصہ کی انگریزی اسپیلنگ کا معمہ حل کردیا

انٹرویو کے دوران عروا کی بات کاٹتے ہوئے ماورا نے بتایا کہ عروہ فرحان سے ملنے کے بعد اُن کے پاس آئی تھیں اور پوچھا تھاکہ یہ فرحان کون ہے؟،‘ جس پر ماورا نے اُنہیں بتایا کہ یہ معروف گلوکار فرحان سعید ہے۔‘

عروا کا مزید بتانا تھا کہ ’ماورا نے اُنہیں فرحان سعید کے گانے گِنوائے اور بتایا کہ فرحان کا تعلق مشہورِ زمانہ جَل میوزک بینڈ سے ہے جس پر اُنہیں معلوم ہوا کہ فرحان سعید کون ہیں۔‘

واضح رہے کہ پاکستان کی معروف اداکارہ عروا حسین اور گلوکار فرحان سعید کی شادی 18 دسمبر2016 ء کو ہوئی تھی ۔