آپ آف لائن ہیں
پیر3؍صفر المظفّر 1442ھ 21؍ستمبر 2020ء
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
Jang Group

پشاور: BRT اسٹاپس پر بس سروس معطل کے بورڈ آویزاں


پشاور میں آگ لگنے اور تکنیکی خرابی کے بڑھتے واقعات کے باعث بی آر ٹی سروس معطل ہوگئی ،صبح سویرے بس اسٹاپس پہنچنے والے مسافروں کا استقبال ’بس سروس معطل ہے‘ کے بورڈ نے کیا، صوبائی وزیر شوکت یوسف زئی کاکہنا ہے کہ سروس حفاظتی طور پر معطل کی ہے۔

خیبر پختونخوا میں وزیر برائے ثقافت شوکت یوسف زئی کاکہنا ہے کہ کل ماس ٹرانسزٹ بورڈ میٹنگ ہوگی جس میں معاملات کا جائزہ لیا جائے گا، بی آر ٹی کی بسیں انشورڈ ہیں اور وارنٹی میں ہیں۔

انہوں نے کہا کہ بسیں چلانے کے بعد مختلف فالٹس سامنے آئے ہیں جس کے بعد بی آرٹی بنانے والی کمپنی نے کہا ہے کہ حفاظتی طور پر سروس معطل کردیں۔

شوکت یوسف زئی نے بتایا کہ جب بسوں کا ٹرائل کیا تو اس وقت کوئی فالٹ نظر نہیں آیا تھا۔

بی آر ٹی سروس معطل ہوجانے کے سبب صبح سویرے سے ہی شہریوں کو مشکلات کا سامنا ہے،بی آر ٹی اسٹاپس پر ’بس سروس معطل ہے‘ کے بورڈ آویزاں کردیئے گئے۔

ترجمان بی آر ٹی کاکہنا ہے کہ عارضی طور پر سروس معطل کرنےکی وجہ بسوں میں آگ لگنے کے واقعات ہیں اور یہ فیصلہ مسافروں کی حفاظت کے پیش نظر کیا گیا ہے۔

ترجمان نے بتایا کہ بسوں کو تکینیکی اعتبار سے کلیئر کرنے کے بعد چلایا جائے گا،جبکہ بسوں میں آگ لگنےکی تحقیقات کےلیےچین سے 5 رکنی ٹیم پہنچ چکی ہے۔

واضح رہے کہ سروس معطل ہوجانے کے بعد بی آر ٹی کی 128 بسیں چمکنی ڈپو میں کھڑی کر دی گئی ہیں۔

قومی خبریں سے مزید