• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

اوباما نے ایرانی ملاؤں کو مالیاتی نظام سے جوڑا، ٹرمپ نے انہیں روک دیا، سینیٹر کروز

آج کا اخبار
یورپ سے
11 اکتوبر ، 2020
واشنگٹن (این این آئی)امریکی سینیٹر ٹیڈ کروز کی جانب سے جاری ایک بیان میں ایرانی مالیاتی سیکٹر پر مکمل طور پر پابندیاں عائد کرنے سے متعلق امریکی انتظامیہ کے اقدام کو سراہا گیا ہے۔ کروز امریکی سینیٹ میں خارجہ تعلقات کی کمیٹی کے رکن بھی ہیں۔ غیرملکی خبررساں ادارے کے مطابق اپنے بیان میں کروز کا کہنا تھا کہ اوباما-بائیڈن کی انتظامیہ نے ایران کے ملاؤںکو پھر سے عالمی مالیاتی نظام سے جوڑ دیا تھا اور انہیں جوہری معاہدے کے تحت اربوں ڈالروں سے نواز دیا جب کہ یہ معاہدہ کسی المیے سے کم نہیں۔ اس کے نتیجے میں ایرانی نظام منی لانڈرنگ اور دہشت گردی کی فنڈنگ میں کامیاب رہا۔کروز نے مزید کہا کہ میں یہاں ٹرمپ کی انتظامیہ کو شاباش دوں گا کہ وہ اس نوعیت کے اقدام کے واسطے حرکت میں آئی۔ اس کے نتیجے میں عالمی مالیاتی نظام کو تحفظ ملے گا اور ایران کے شرپسند علاقائی نفوذ میں کمی آئے گی۔ میں ان پابندیوں پر عمل درامد کو یقینی بنانے کے واسطے امریکی انتظامیہ کے ساتھ کام کرنے کا خواہاں ہوں۔دسمبر 2018 میں سینیٹر ٹیڈ کروز نے ایک قانونی بل پیش کیا تھا جس کا مقصد ایران کو غیر قانونی فنڈنگ پر پابندی سے متعلق قانون کے حصے کے طور پر ایرانی مالیاتی سیکٹر کو سزا کا مستحق ٹھہرانا تھا۔رواں سال کے اوائل میں سینیٹر ٹیڈ کروز نے مالیاتی ورکنگ ٹیم ایف اے ٹی ایف کی جانب سے ایران کے خلاف اقدامات کے تعطل کو ختم کرنے کو سراہا۔ فروری 2019 میں سینیٹر کروز نے امریکی وزیر خزانہ منوچن اسٹیفن کو ایک خط بھیجا جس میں ٹرمپ انتظامیہ پر زور دیا گیا تھا کہ وہ امریکا کی آواز اور نفوذ کو استعمال کرے تا کہ مالیاتی اقدامات سے متعلق ورکنگ ٹیم ایران کے خلاف اقدامات کو لاگو کرے۔
تازہ ترین