وزیراعظم عمران خان کا انٹرویو

30 نومبر ، 2020

پاکستان کو گزشتہ دو دہائیوں کے دوران دہشت گردی کے خلاف جنگ اور دیگر چیلنجوں کے نتیجے میں ہزاروں انسانی جانوں کے ساتھ ساتھ کھربوں روپے کے مالی نقصان، عالمی اقتصادی پابندیوں نیز تجارتی، صنعتی اور معاشی ڈھانچے کی بربادی کا سامنا بھی کرنا پڑا۔ موجودہ حکومت کے مطابق اِسی مدت کے دوران کرپشن اور بدعنوانی بھی انتہا کو جا پہنچے۔ نتیجہ یہ کہ پی ٹی آئی 22سالہ جدوجہد کے بعد اقتدار میں آئی تو بدحال معیشت کا سارا ملبہ اس پر آن پڑا۔ وزیراعظم عمران خان نے اِس حوالے سے ہفتے کے روز ایک نجی ٹی وی چینل کو دیے گئے انٹرویو میں واضح کیا کہ میرے اوپر نہ کوئی دباؤ ہے، نہ کرپشن سے پاک لوگ کسی دباؤ کو خاطر میں لاتے ہیں۔ تمام ادارے اپنا اپنا کام کر رہے ہیں، ہم نے بشمول نیب تمام اداروں کو آزاد رکھا ہے اور اُن پر ہمارا کوئی کنٹرول نہیں، البتہ ایسا ضرور ہے کہ جب نیب اپوزیشن کے کسی رہنما کے خلاف کوئی انکوائری کرتی ہے تو اُسے سیاسی انتقام کا نام دیا جاتا ہے اور یہی لوگ اُس وقت خاموش رہتے ہیں جب نیب حکومت میں شامل کسی فرد کے خلاف انکوائری کا حکم دے حالانکہ آصف زرداری اور نواز شریف کے خلاف جتنے بھی کیس ہیں وہ سابقہ حکومتوں کے دائر کردہ ہیں۔ وزیراعظم نے ایک کروڑ نئی ملازمتوں اور گھروں کی تعمیر کے حوالے سے صراحت کی کہ یہ وعدہ پانچ سال کی مدت میں پورا ہوگا۔ اُن کا دعویٰ تھا کہ یہ جمہوری دور ہے اور ملک میں آزادیٔ اظہار پر کوئی پابندی نہیں۔ وزیراعظم کے بقول اُنہوں نے مخالفین کی بات ہمیشہ کھلے دل سے سنی اور ہر اعتراض کا جواب مثبت انداز میں دیا۔ متذکرہ انٹرویو میں اُنہوں نے پی ٹی آئی حکومت کے نئے شہر بسانے، صنعتی و تجارتی عمل میں تیزی لانے سمیت جملہ اقتصادی معاملات کا احاطہ بھی کیا تاہم اِس میں کمر توڑ مہنگائی کا ذکر نہیں ملا جو آج کروڑوں پاکستانیوں کا سب سے بڑا مسئلہ ہے۔

اداریہ پر ایس ایم ایس اور واٹس ایپ رائے دیں00923004647998

تازہ ترین