شیخ رشید کو وزیر داخلہ بنا دیا گیا ہے، اللّٰہ خیر کرے، نفیسہ شاہ

12 دسمبر ، 2020

رہنما پیپلز پارٹی نفیسہ شاہ کا کہنا ہے کہ ریلوے کے مسافروں نے ڈھائی سال تک شیخ رشید کو بھگتا ہے، ملک کے تقریباً ہر ٹریک پر ریلوے کے حادثات ہوئے اور اب شیخ رشید کو وزیر داخلہ بنا دیا گیا ہے، اللّٰہ خیر کرے۔

پاکستان پیپلز پارٹی کی رہنما نفیسہ شاہ نے میڈیا سے گفتگو کرتے ہوئے کہا کہ پیپلز پارٹی کی سی ای سی میٹنگ میں استعفے اسپیکر کو جمع کروانے پر تبادلہ خیال کیا جائے گا، صوبائی و قومی اسمبلی سے استعفوں کا حتمی فیصلہ پی ڈی ایم کی ہدایت پر کیا جائے گا۔

نفیسہ شاہ نے کہا کہ سندھ کے ارکان آگے بڑھ کر اپنے استعفے دے رہے ہیں، سندھ حکومت نے اپنے ارکان کو استعفے دینے کی ہدایت کر دی ہے، اپوزیشن کے اتحاد کی وجہ سے حکومت کے چہرے پر ہوائیاں اُڑی ہوئی ہیں۔

انہوں نے کہا کہ حکومت جلسے کے انتظامات کرنے والوں کے خلاف کریک ڈاؤن میں مصروف ہے اور اپوزیشن قائدین کے خلاف اوچھے ہتھکنڈے استعمال کر رہی ہے۔ حکومت اپوزیشن کے جلسے دیکھ کر اب منتوں پر اُتر آئی ہے۔

رہنما پیپلز پارٹی نے کہا کہ اپوزیشن پی ڈی ایم کے 26 نکات پر مکمل عملدرآمد کر رہی ہے، خان صاحب نے تمام مافیاز اپنے ارد گرد اکٹھے کر لیے ہیں، وہ اپنے ذاتی دوستوں کو وزارتیں دے کر نواز رہے ہیں۔

نفیسہ شاہ کا کہنا ہے کہ عوام ہمارا ساتھ دیں اور اس جعلی حکومت کے خلاف احتجاج میں شریک ہوں۔

انہوں نے میڈیا سے گفتگو کرتے ہوئے مزید کہا کہ لانگ مارچ ہونا ہے لیکن صرف اس کے وقت کا تعین کیا جانا ہے، حکومت ہٹانے کے لیے ہر آئینی راستہ اختیار کریں گے۔

تازہ ترین