PDM جلسہ، گریٹر اقبال پارک کا کونسا گیٹ کس کیلئے مختص

13 دسمبر ، 2020

لاہور کے گریٹر اقبال پارک میں مینارِ پاکستان تلے آج اپوزیشن کے اتحاد پاکستان ڈیموکریٹک موومنٹ (پی ڈی ایم) کا جلسہ ہونے جا رہا ہے، پارک کے 6 گیٹ ہیں اور جلسے کی انتظامیہ کی جانب سے طے کر لیا گیا ہے کہ کس گیٹ سے کون آئے گا۔

گریٹر اقبال پارک کے گیٹ نمبر 1 کو مرکزی قیادت کی آمد و رفت کے لیے مختص کر دیا گیا ہے۔

گیٹ نمبر 2 اور 3 کو سیکیورٹی وجوہات کی وجہ سے بند کر دیا گیا ہے، گیٹ نمبر 4 اور 6 سے مرد حضرات جلسہ گاہ میں داخل ہوں گے۔

جلسہ گاہ میں خواتین کی انٹری کے لیے گیٹ نمبر 5 مختص کیا گیا ہے، گریٹر اقبال پارک میں 8 بڑی اسکرینیں بھی لگائی جا رہی ہیں۔

واضح رہے کہ لاہور میں حکومت مخالف اتحاد پاکستان ڈیموکریٹک موومنٹ کا پاور شو آج ہونے جا رہا ہے۔

مینارِ پاکستان کے گراؤنڈ میں قائدین کے لیے کنٹینر منگوا لیے گئے ہیں، شرکاء کے لیے کرسیاں لگ گئی ہیں۔

اپوزیشن اتحاد کے جلسے کی سیکیورٹی جمعیت علمائے اسلام (ف) کے کارکنوں کے سپرد کر دی گئی ہے۔

مسلم لیگ نون کی طرف سے اپوزیشن کے اتحاد پاکستان ڈیموکریٹک موومنٹ (پی ڈی ایم) کے قائدین کے لیئے آج ظہرانے کا اہتمام بھی کیا گیا ہے۔

مسلم لیگ نون کی نائب صدر مریم نواز شریف، پاکستان پیپلز پارٹی کے چیئرمین بلاول بھٹو زرداری، جمعیت علمائے اسلام ف اور پاکستان ڈیموکریٹک موومنٹ (پی ٹی ایم) کے سربراہ مولانافضل الرحمٰن اور دیگر رہنما نون لیگی رہنما اور سابق اسپیکر قومی اسمبلی ایاز صادق کی رہائش گاہ پہنچیں گے جہاں ان کے لیے ظہرانے کا انعقاد کیا گیا ہے۔

یہ بھی پڑھیے

پی ڈی ایم رہنما ظہرانے کے بعد جلسہ گاہ مینارِ پاکستان کے لیے روانہ ہو جائیں گے۔

ادھر پی ڈی ایم لاہور کے جلسے میں شرکت کے لیے پنجاب بھر کے مختلف شہروں میں پی ڈی ایم سے تعلق رکھنے والی جماعتوں کے کارکن جمع ہونا شروع ہو گئے۔

کئی شہروں اور دیہات سے سیاسی جماعتوں کے کارکن رہنماؤں کے ہمراہ لاہور کی جانب روانہ ہو چکے ہیں جبکہ کچھ آنے کے لیے مختلف مقامات پر اکٹھے ہو رہے ہیں جو ریلیوں کی صورت روانہ ہوں گے۔

ملتان میں کارکنان مسلم لیگ نون کے سابق ارکانِ قومی اسمبلی اور عہدے داروں کے گھر پہنچ گئے، تمام ریلیاں شام کوٹ کے مقام پر اکھٹی ہو کر موٹروے پر سفر شروع کریں گی۔

تازہ ترین